जनता समाजवादी पार्टी (जसपा), नेपालका अध्यक्ष उपेन्द्र यादवले पार्टीबाट अलग भएर गएका कार्यकता तथा सांसदहरूलाई पार्टीमै फर्कन आह्वान गरेका छन्।
शुक्रबार आह्वान पत्र जारी गर्दै अध्यक्ष यादवले (जसपा) नेपालबाट अलग भई उक्त पार्टीमा गएकालाई फर्कन आह्वान गरेका हुन्।
अध्यक्ष यादवले जसपा, नेपाल उत्पीडित राष्ट्रियताको मुक्ति, हिमाल, पहाड र तराई/ मधेशबीचको पारस्परिक सम्मान र एकता निर्माण गर्ने संगठन भएको समेत बताएका छन्।
'समाजवादी आन्दोलन, पहिचान, संघीयता र लोकतान्त्रिक गणतन्त्र लगायतका सवालमा प्रतिबद्ध भएर पनि भ्रमबस फरक पार्टीमा जानु भएका साथीहरूलाई गलत बाटो छोडेर मूलधारको जनता समाजवादी पार्टी, नेपालमा फर्किन हुन हार्दिक आह्वान गर्दछौं,' आह्वान पत्रमा लेखिएको छ।
वैशाख २३ गते उपेन्द्र यादव नेतृत्वको जनता समाजवादी पार्टी नेपालबाट विभाजन भएर अशोक राईको नेतृत्वमा जनता समाजवादी पार्टी गठन भएको थियो।
