प्रमुख प्रतिपक्षी नेपाली कांग्रेसले राष्ट्रपति र प्रधानमन्त्रीको विदेश भ्रमणबारे सदनलाई जानकारी गराउन माग गरेको छ।
प्रतिनिधि सभाको शुक्रबारको बैठकमा बोल्दै कांग्रेस प्रमुख सचेतक रमेश लेखकले राष्ट्रपति र प्रधानमन्त्रीको विदेश भ्रमणबारे सदनमा जानकारी गराउन माग गरेका हुन्।
राष्ट्रपति रामचन्द्र पौडेल स्वीटजरल्याण्ड र जर्मनी भ्रमणमा गएका छन्। उनी असार ५ गते स्वदेश फर्किने कार्यक्रम छ।
साथै प्रधानमन्त्री पुष्पकमल दाहाल 'प्रचण्ड' दुई दिने भारत भ्रमण गरी स्वदेश फर्किसकेका छन्।
भारतीय प्रधानमन्त्री नरेन्द्र मोदीको शपथग्रहण समारोहमा सहभागी भएका प्रधानमन्त्री दाहालले मोदी, विदेश मन्त्री एस जयशंकर लगायतसँग भेटेका थिए।
कांग्रेस सचेतक लेखकले आगामी प्रतिनिधि सभा बैठकमा राष्ट्रपति र प्रधानमन्त्रीको विदेश भ्रमणबारे जानकारी दिइनुपर्ने बताएका हुन्।
‘आगामी दिनको यो प्रतिनिधि सभा बैठक प्रारम्भ हुनेबित्तिकै प्रधानमन्त्रीज्यूबाट आफ्नो भारत भ्रमण र राष्ट्रपतिजीको विदेश भ्रमणका बारेमा सदनलाई जानकारी हुनुपर्छ, अखबार पढेर समाचार जानकारी हुने अवस्था नबनोस्,’ लेखकले भने, ‘यसमा सभामुखबाट रूलिङ हुनुपर्छ।’
राष्ट्र प्रमुख, सरकार प्रमुख र मन्त्रीहरू सदन चलिरहेका बेला विशेष खालका निर्णय गरेर जानुपर्ने प्रचलन रहेको पनि उनले बताए।
साथै लेखकले प्रधानमन्त्री दाहाललाई संसद बैठकमा नदेखिएको पनि बताएका थिए।
‘प्रधानमन्त्री सदनमा देखिराख्नुभएको छैन। केही समय पहिला उपप्रधान तथा गृहमन्त्री रवि लामिछानेले यो सदनमै रहेका नेताहरूमाथि अत्यन्तै ज्यादा लाञ्छनापूर्ण अभिव्यक्तिहरू दिनुभयो। हामीले प्रधानमन्त्रीसँग उहाँले अभिव्यक्त गर्नुभएको कुरामा जबाफ दिनुपर्छ भनेर माग गरेका छौं। हामीले माग गरेको विषयमा तयारी गरेर बस्नुभएको हो कि?,’ प्रधानमन्त्री दाहाललाई लक्षित गर्दै उनले भने, ‘त्यो तयारी सकिएपछि मात्रै एकैचोटी जबाफ दिन्छु भनेर आउनुहुने हो कि? अथवा त्यसको जवाफ दिन नसकेर डराएर भाग्न खोज्नुभएको हो कि? मैले के अनुमान गर्ने?’
साथै उनले नेपालका प्रधानमन्त्री भारतको लोकसभाको निर्वाचनपछि निर्वाचित प्रधानमन्त्रीलाई शुभकामना दिन जानु राम्रो भएको पनि बताए।
‘तर प्रधानमन्त्रीले भारत गएपछि संघीय संसदलाई बिर्सनु भयो, हाम्रो एउटा संसदीय परम्परा छ। देशको कार्यकारी प्रमुख प्रधानमन्त्री कुनै पनि मन्त्री राष्ट्रको भ्रमणमा जाँदा किन जाने, के उद्देश्यले जाने, कति दिनका लागि जाने भनेर संसदलाई जानकारी दिने बाध्यत्मक परम्परा छ,’ उनले भने, ‘प्रधानमन्त्री एक हप्ता पहिला भारत भ्रमणमा जानु भएको थियो। फर्कर आएको पनि पाँच दिन भइसकेको छ। प्रधानमन्त्री सदनमा उपस्थिति हुनु होला भनेर प्रतिपक्षले पर्खिराखेको छ।’
उनले राष्ट्रपतिको भ्रमणबारे पनि जानकारी गराउनुपर्ने बताए।
‘सदनले राष्ट्रपति र प्रधानमन्त्री देश बाहिर गएको कुरा अखबार बढेर थाहा पाउनुपर्ने दुर्भाग्य भन्नुपर्छ। सरकारका कारणले संसदको न्यूनतम गरिमा र मर्यादा पनि कायम गर्ने काम भएन, यो खेदजनक छ,’ लेखकले भने।
यसैबीच सभामुख देवराज घिमिरेले सदनमा उठेका विषयमाथि सरकारलाई जबाफ दिन रूलिङ गरेका छन्।
‘शून्य, आकस्मिक एवं विशेष समयमा माननीय सदस्यहरूले उठाउनुभएको विषयहरूप्रति नेपाल सरकारको ध्यान आकर्षण गराउन चाहन्छु,’ सभामुख घिमिरेले भने।
-1746009348.jpg)
