नेपाली कांग्रेसका सभापति शेरबहादुर देउवाले एकताबद्ध भए अहिलेकै निर्वाचन प्रणालीमा पनि कांग्रेसले बहुमत ल्याउन सक्ने बताएका छन्।
पोखरामा सोमबार प्रदेश सभापतिलाई अभिमुखीकरणका लागि आयोजना गरिएको कार्यक्रममा बोल्दै सभापति देउवाले संगठित भए कांग्रेसलाई बहुमत प्राप्त पार्टी बनाउन सकिने बताए।
‘अहिले हामीले समावेशी एवं समानुपातिक राजनीतिक प्रणाली अवलम्बन गरेका छौं, यसबाट कुनै एउटा पार्टीको बहुमत आउन गाह्रो छ। तैपनि हामीले सबैभन्दा ठूलो पार्टी बनायौं। अझ पार्टीका सबै साथीहरूबीच एकता भयो भने भोलिका दिनमा कांग्रेसलाई बहुमत प्राप्त पार्टी बनाउन सकिन्छ,’ सभापति देउवाले भने।
पार्टीको केन्द्रीय नीति, अनुसन्धान तथा प्रशिक्षण प्रतिष्ठानले गरेको कार्यक्रममा बोल्दै सभापति देउवाले विद्यमान समावेशी एवं समानुपातिक राजनीतिक प्रणालीका कारण एउटा पार्टीको बहुमत आउन गाह्रो भए पनि एकताबद्ध प्रयास भएमा कांग्रेसले बहुमत ल्याउने बताएका हुन्।
संवैधानिक व्यवस्थासहित राज्य सञ्चालनमा मुलुकका सबै जातजाति, भाषा, समुदाय र क्षेत्रको प्रतिनिधित्व सुनिश्चित गरेको उनले बताए।
उनले प्राप्त अधिकारको सदुपयोग गर्दै अघि बढ्नुपर्ने बताए।
अभिमुखीकरणले पार्टीको आगामी कार्यदिशा तय गर्दै समस्याको समाधान खोज्न मार्गनिर्देश गर्ने विश्वास सभापति देउवाको छ।
-1746009348.jpg)
