पूर्वप्रधानन्यायाधीश सुशीला कार्कीले न्यायाधीशहरूले फलको आश नगरी कर्म गर्नुपर्ने बताएकी छन्।
सोमबार ललितपुरमा अन्तर्राष्ट्रिय महिला न्यायाधीश दिवसका अवसरमा आयोजित ‘महिला न्यायाधीश सम्मेलन–२०८१’ कार्यक्रमलाई सम्बोधन गर्दै उनले महिला न्यायाधीश भएर आउँदैमा सबै कुरा पूरा नहुने बताइन्।
उनले महिला न्यायाधीशमा क्षमता र साहस हुन जरूरी रहेको बताइन्।
उनले न्यायाधीशले धेरै अध्ययन गर्न जरूरी रहेको बताइन्।
उनले न्यायाधीशले कहिले पनि जस लिने आशा गरेर न्याय सम्पादन गर्न नहुने बताइन्।
उनले जस दिन्छन् कि दिँदैनन् भनेर न्याय गर्ने भन्दा पनि पीडितले न्याय पाउने गरी न्याय सम्पादन गर्न जरूरी रहेको बताइन्।
आफ्नो क्षमतालै भ्याएसम्म न्याय सम्पादन गर्न आग्रह गरिन्।
पूर्वप्रधानन्यायाधीश कार्कीले ‘महिला न्यायाधीश भएर आउँदैमा सबै कुरा हुँदैन। महिला न्यायाधीशमा क्षमता हुनुपर्छ। साहस हुनैपर्छ। अध्ययन त दिनरात गर्नैपर्छ। हामीले कर्म गर्ने हो, फलको आशा गर्नु हुँदैन। कृष्ण भगवानले पनि कर्म गर, फलको आशा नगर भन्नुभएको छ। मलाई अहिले के महसुस भएको छ भने हामीले काम गर्ने हो पछाडि के भन्छन् भनेर सरोकार राख्नु हुँदैन। यो यस्तो क्षेत्र हो अदालतमा १० हजार मुद्दा छ भने २० हजार मानिस हुन्छ। १० हजारले जित्छ, १० हजारले हार्छ। हार्ने १० हजारले कहिल्यै जस दिँदैन अदालतलाई। त्यसैले मैले काम गरेँ तर किन जस दिएन भनेर सोच्दै नसोच्नुस्। आफ्नो क्षमताले भ्याएसम्म काम गर्नुस्।’
पूर्वप्रधानन्यायाधीश कार्कीले न्यायाधीशले पक्षपात नगरी न्याय दिनुपर्ने बताइन्।
उनले एउटा न्यायले सबैको विकास हुुने बताइन्। — न्युज एजेन्सी नेपाल
