नेपाली कांग्रेसका सांसद गगन थापाले प्रश्न र आलोचना गरे पनि घृणा फैलाउने काम नगर्न आग्रह गरेका छन्।
प्रतिनिधि सभाको मंगलबारको बैठकमा बोल्दै कांग्रेसका महामन्त्रीसमेत रहेका थापाले कुनै पनि व्यक्तिका बारेमा घृणा फैलाउने काम गर्न नहुनेमा जोड दिए।
‘केही कुरामा हाम्रा बीचमा समझदारी हुनैपर्छ- यो संविधान जोगाउने कुरामा, संवैधानिक संस्था जोगाउने कुरामा, यसलाई ठिक ढंगले लैजाने कुरामा हामी सबैका बीचमा समझदारी हुनैपर्छ,’ प्रतिपक्षी दलहरूप्रति लक्ष्य गर्दै थापाले भने, ‘प्रश्न गरौं, आलोचना गरौं तर घृणा फैलाउने काम नगरौं। कुनै व्यक्तिका बारेमा यसरी पनि घृणा नफैलाऔं कि त्यो घृणाले हामी सबैलाई लिएर जान्छ। त्यसैले संसदभित्र र बाहिर प्रतिस्पर्धा सभ्य र सुसूचित बहस गरौं।’
सरकारले कुनै पनि अहंकार नराखीकन प्रतिपक्षले उठाएका कुरालाई सम्बोधन गर्दै जाने अभ्यास गर्नुपर्ने थापाले बताए।
‘यति गर्दै गयो भने परिवर्तनका पक्षमा रहेकाहरू संवाद र सत्कार्यबाट हामीसँगै बाँधिने अवस्था बनाउन सकिन्छ,’ उनले भने, ‘यो संविधान जोगाउने र कुनै पनि षड्यन्त्रका विरूद्धमा एमाले, माओवादी र अरू दलसँग कांग्रेस दृढ भएर उभिने प्रतिबद्धता दोहोर्याउँछु।’
महामन्त्री थापाले नागरिकहरूका असन्तुष्टिहरू सुन्नुपर्ने पनि बताए। सरकारले कुनै पनि अहंकार नराखी नागरिकहरूका असन्तुष्टिलाई समयमै बुझेर समाधान खोज्नुपर्ने बताए।
जनआन्दोलनका बेला दलहरूलाई साथ दिएका जनता तथा नागरिक समाज असन्तुष्ट रहेको पनि उनको भनाइ छ।
