राष्ट्रिय स्वतन्त्र पार्टीका सांसदहरूले नेपाल सरकारको नाममा रहेको काठमाडौंको लोकतान्त्रिक चोकको जग्गा नेपाली कांग्रेसका नेताले कब्जा गरेको आरोप लगाएका छन्।
बुधबारको प्रतिनिधि सभा बैठकमा बोल्दै रास्वपा सांसद शिशिर खनाल र सुमना श्रेष्ठले काठमाडौंको तारकेश्वर नगरपालिका वडा नम्बर ९ स्थित लोकतान्त्रिक चोकको मचागा (नेवार समुदायको चिहान रहेको जग्गा) कांग्रेस नेताले कब्जा गरेको आरोप लगाएका हुन्।
सरकारको नाममा रहेको कित्ता नम्बर ६२ र ६३ कांग्रेसका नेताले कब्जामा लिई भोगचलन गर्दै आएको सांसद खनालको भनाइ छ। उनले उक्त जग्गा कांग्रेस नेताले भोगचलन गर्दै आएकोमा स्थानीय बासिन्दाले विरोध गरेको, उजुरी दिएको तर पनि स्थानीय सरकारले जग्गा संरक्षणमा कुनै चासो नदेखाएको बताएका थिए।
सांसद खनालले यो विषय राखेपछि कांग्रेस सांसद राजेन्द्र बजगाईंले उठेर विरोध गरेका थिए। सभामुखले ध्यानाकर्षण भएको भनेपछि बैठक अघि बढेको थियो
केहीबेरपछि रास्वपा सांसद सुमना श्रेष्ठले फेरि त्यही कुरा दोहोर्याइन्। त्यसपछि कांग्रेस सांसदहरूले उठेर विरोध गरेका थिए। कांग्रेसका कुन नेताले लोकतान्त्रिक चोकस्थित उक्त जग्गा कब्जा गरेको हो रास्वपा सांसदहरूले नाम खुलाएका छैनन्।
