रोल्पामा स्वतन्त्र विद्यार्थी युनियन (स्ववियु) निर्वाचनमा नेकपा (एमाले) र नेकपा (माओवादी केन्द्र) निकट विद्यार्थी संगठनले तालमेल गर्ने भएका छन्।
एमाले निकट अनेरास्ववियुका रोल्पा अध्यक्ष सूर्य विक र माओवादी केन्द्रनिकट अखिल क्रान्तिकारी अध्यक्ष सनिदेवल बुढा मगरले संयुक्त विज्ञप्ति जारी गरेर रोल्पाका क्याम्पसहरुमा दुई संगठनबीच तालमेल गर्ने निर्णय भएको जानकारी दिए।
'नेपाली विद्यार्थी आन्दोलनको ऐतिहासिक उपलब्धीका रूपमा रहेको स्वतन्त्र विद्यार्थी युनियनलाई वामपन्थी विचारधाराले प्रेरित विद्यार्थी संगठनहरूले सञ्चालन गर्दा अझ प्रभावकारी बनाउन सकिने ठहर गर्दै नेकपा (एमाले) निकट विद्यार्थी संगठन र नेकपा (माओवादी केन्द्र)निकट विद्यार्थी अखिल (क्रान्तिकारी)बीच तालमेल, सहकार्य र एकताको आवश्यकतालाई महशुस गर्दै यो निर्वाचनमा संयुक्त ढंगले अगाडि बढ्ने सहमति भयो,' दुई अध्यक्षले जारी गरेको विज्ञप्तिमा भनिएको छ।
दुई विद्यार्थी संगठनले जिल्लामा रहेका त्रिभुवन विश्वविद्यालय अन्तर्गतका चार क्याम्पसमा संयुक्त प्यानल बनाउने घोषणा गरेका छन्।
संयुक्त प्यानलका लागि भागबन्डा पनि टुंगिएको छ।
जसअनुसार, नव नेपाल क्याम्पससमा अनेरास्ववियुलाई अध्यक्ष, सहसचिवसहित २ सदस्य र अखिल क्रान्तिकारीलाई उपाध्यक्ष, सचिव, कोषाध्यक्षसहित ४ सदस्य दिइने सहमति भएको छ।
जलजला क्याम्पसमा अनेरास्ववियुले उपाध्यक्ष, सचिव, कोषाध्यक्षसहित सदस्य तथा अखिल क्रान्तिकारीले अध्यक्ष, सहसचिवसहित सदस्य लिने सहमति भएको छ।
रोल्पा नमुना क्याम्पसमा एक प्रत्यक्ष सदस्यबाहेक सबै अखिल क्रान्तिकारीका उम्मेदवार रहनेछन् भने शहिद स्मृति क्याम्पसमा अखिल क्रान्तिकारीलाई मात्रै सहयोग गर्ने सहमति भएको विज्ञप्तिमा उल्लेख छ।
