सत्तारूढ नेपाली कांग्रेसका सांसद रामहरि खतिवडाले काठमाडौंबाट २५ करोड रूपैयाँ बरामद भएको घटना ३३ किलो सुन र अन्य प्रकरणजस्तै बन्न नदिन सरकारको ध्यानाकर्षण गराएका छन्।
बुधबार प्रतिनिधि सभाको बैठकमा सांसद खतिवडाले विगतका त्यस्ता घटनाहरूले जनतामा निराशा पैदा गराएको बताउँदै अवैध रकम भेटिएको घटना पनि भरिया र ड्राइभर पक्राउमै सिमित नहोस् भनी सरकारो ध्यानाकर्षण गराएका हुन्।
'कहिले १८ किलो र कहिले ३३ किलो सुनका नाउँमा यसैगरी विभिन्न ड्राइभर र भरियाहरूलाई पक्रिने मालिकसम्म नपुग्ने प्रवृत्ति हिजोका दिनमा देखिएको थियो,' उनले भने, ' त्यो नदोहोरियोस्।'
अवैध मुद्रासहित मान्छे समातेको विषयले सरकार तस्कर र भ्रष्टाचारीहरूलाई समात्न कारबाही गर्न तयार छ भन्ने देखाएको उनको दाबी थियो।
'सरकार यस्ता तस्करको नाइकेहरूसम्म पुगोस्। जुन तहको भएपनि कारबाहीको दायरमा ल्यायोस्,' उनले भने।
