पूर्वराजा ज्ञानेन्द्र शाहले श्री ५ महाधराजाधिराज र शाही निशान प्रयोग गरेकोमा संसदमा प्रश्न उठेको छ।
सत्तारूढ नेपाली कांग्रेसका सांसद रामहरि खतिवडाले बिहीबारको प्रतिनिधि सभा बैठकमा पूर्वराजालाई संविधान नमिच्नका लागि सरकारले आग्रह गर्नुपर्ने पनि बताए।
‘पूर्वराजा ज्ञानेन्द्रले फागुन ६ गते दिएको भिडिओ सन्देशमा श्री ५ महाराजाधिराज भन्ने उल्लेख गरिएको र शाही निशान प्रयोग गरेको देखियो, शाही निशान २०६५ जेठ १७ गते हटाएर त्यहाँ राष्ट्रिय झण्डा राखिएको थियो र नेपालको संविधानमा कहीँ पनि श्री ५ महाराजाधिराज भन्ने उल्लेख छैन, त्यसैले सरकारले त्यस्ता कार्य नगर्न र संविधान नमिच्न आग्रह गरोस्,’ उनले भने।
२०६५ जेठ १६ गतेका दिन शाही निशानको झण्डा दरबारबाट हटाएर राष्ट्रिय झण्डा फहर्याइएकोमा त्यसलाई अपमान गरेर फेरि शाही निशान झण्डा प्रयोग गरिएको उनले बताए। ‘यस्ता कार्य बन्द गरियोस्,’ उनले भने।
