सिरहाको ओरही गाउँपालिका-५ मा महायज्ञ गर्न पालिकाले दलित परिवारको घर भत्काइएको घटनाबारे सांसदहरूले प्रश्न उठाएका छन्।
बिहीबार प्रतिनिधि सभाको शून्य समयमा बोल्ने सांसदहरूले संविधनमा जातीय विभेद र छुवाछुतलाई दण्डनीय उल्लेख भएको तर पनि विभेदका घटनाहरू भइरहेको भन्दै प्रश्न उठाएका हुन्।
त्यो घटनामा संलग्न भनिएका गाउँपालिका अध्यक्ष शिवजी यादव र विष्णु महायज्ञका आयोजक भनिएका बजरंगी बाबालाई कारबाही गर्न सांसदहरुले माग गरेका छन्।
सत्तारूढ नेपाली कांग्रेसका सांसद जीवन परियार, नेकपा (एमाले)की सम्झना थपलिया, जनमत पार्टीका अब्दुल खान, प्रमुख प्रतिपक्षी दल नेकपा (माओवादी केन्द्र)का रणेन्द्र बराली, रास्वपा सांसद मनिष झा, सन्तोष परियार, अशोककुमार चौधरी, स्वतन्त्र सांसद अमरेशकुमार सिंहले प्रश्न उठाएका हुन्।
‘औरही गाउँपालिका अध्यक्ष शिवजी यादव र जनमत पार्टीका गाउँपालिका अध्यक्ष दिलीप यादवसहितका व्यक्तिहरूले डोम समुदायका व्यक्तिहरूलाई उठिवास गर्ने काम भएकोमा घोर भर्त्सना गर्दछु,’ कांग्रेस सांसद जीवन परियारले भने।
एमाले सांसद थपलियाले यसबारेमा छानबिन समिति बनाउन माग गरिन्।
'दलितको घर भत्काएर गणतन्त्रको जग बलियो हुन्छ?,' उनले भनिन्। उनले घटनाको छानबिन गर्न शक्तिशाली आयोग बनाउन सरकारलाई निर्देशन दिन सभामुखलाई आग्रह गरिन्।
प्रमुख प्रतिपक्षी दल माओवादीक केन्द्रका सांसद रणेन्द्र बरालीले जातीय विभेदका घटनामा सरकारले न्याय नदिएको बताए।
सिरहाको दीपक मल्लिक डोमको घर भत्काइएको मात्र नभई दलितले टेकेको धर्तीसमेत अपवित्र हुन्छ भनेर माटोसमेत खनेर फालिएको उनले बताए।
'त्यस्तो ज्यादती गर्ने? विष्णु महायज्ञका आयोजक भनिएका बजरंगी बाबा र उनलाई भरपूर सहयोग गर्ने गाउँपालिका अध्यक्ष शिवजी यादव हुन्। आफै बसेर डोजर लगाएर घर भत्काउन अग्रसर भए। दलितहरू त बोल्न सकेनन् सिडिओले समेत थाहा छैन भने,' उनले भने।
रास्वपा सांसद मनिष झाले घटनाबारे भर्त्सना व्यक्त गरे। रास्वपकै सांसद अशोककुमार चौधरीले त्यो घटनाले संवैधानिक मूल्य र सामाजिक न्यायको मर्ममा गम्भीर आगाध पुर्याएको बताए।
'अझै अमानवीय के छ भने घर मात्रै फालिएन। दलित समुदायको दुई फिट माटो समेत खनेर फालियो,' उनले भने, 'छुवाछुत अन्त्य भयो? दलितलाई दोस्रो दर्जाको नागरिक ठानिन्छ। प्रशासन र स्थानीय तहको मौनताले के संकेत गर्छ?'
रास्वपा प्रमुख सचेतक सन्तोष परियारले घटनाले संविधानलाई गिज्याएको बताउँदै घटनाको छानबिन गरी पीडकलाई सजाय दिनुपर्ने बताए।
