प्रधानमन्त्री केपी शर्मा ओलीले कर्मचारी नियुक्ति प्रधानमन्त्रीले नभई लोकसेवाले गर्ने सम्झाएका छन्।
बिहीबार प्रतिनिधि सभामा प्रतिपक्षी दल रास्वपाका सांसद मनिष झाको प्रश्नमा जवाफ दिँदै प्रधानमन्त्री ओलीले लोकसेवाले कर्मचारी नियुक्ति गर्ने बताएका हुन्।
सांसद झाले प्रधानमन्त्रीले नियुक्त गरेको कर्मचारीको असक्षमताका कारण सरकार फेल भएको बताएका थिए।
‘तपाईंले नियुक्त गर्नुभएको कर्मचारीको असक्षमताका कारण सरकार फेल भएको तथ्य स्वीकार गर्नुहुन्छ? यदी हो भने तिनीहरूलाई कहिलेसम्म कारबाही गर्नुहुन्छ,’ झाको प्रश्न थियो।
‘आफ्ना मान्छेहरू नियुक्त गरेको भन्ने आरोप सही छैन। त्यसकारण अझ मेरो हैसियत हकमा भन्ने हो भने आफ्नो मान्छे भन्ने कुनै पनि हिसाबले एक जना नियुक्त भएको देखाइदिनुभयो भने यहाँलाई धन्यवाद। सरकार त्यस आफ्नोवाला बाटोमा हिँडेको छैन,’ जबाफमा प्रधानमन्त्री ओलीले भने।
‘प्रश्न भन्दा अगाडि केही व्याख्या राख्नुभयो, केही आक्रोशपूर्ण देखिए। कर्मचारीहरू मैले नियुक्त गरेको होइन। र अहिलेको सरकारले हाम्रो मान्छे होइन, राम्रो मान्छेको खोजी गर्छ। योग्य मान्छे उपयुक्त ठाउँमा राख्छ। त्यसमा कुनै प्रकारको भेदभाव होइन, मेरिटोक्रेसीको आधारमा जिम्मेवारी दिने परिपाटी छ,’ प्रधानमन्त्री ओलीले जबाफ दिँदै भने।
प्रधानमन्त्री ओलीले सांसद झाले प्रश्न भन्दा आक्रोश व्यक्त गरेको र आरोप लगाएको बताए।
'प्रश्न सोध्नुभयो भने जबाफ दिन्छु । आरोप लगाएपछि खण्डन गर्नुपर्छ,' प्रधानमन्त्री ओलीले भने।
-1742456079.jpeg)
