नेकपा (एकीकृत समाजवादी) रूपन्देहीको जिल्ला अधिवेशनको तयारीमा जुटेको छ। एकीकृत समाजवादीले यही चैत ९ र १० गते बुटवलमा १० औं जिल्ला अधिवेशन गर्दैछ। सो पार्टीले बिहीबार बुटवलमा पत्रकार सम्मेलन गरी उक्त अधिवेशनको तयारी पूरा भएको जनाएको हो।
तत्कालीन नेकपा (एमाले) बाट विद्रोह गरी २०७८ साल भदौ ९ गते नेकपा एकीकृत समाजवादी पार्टी स्थापना भएको थियो।
सोही अनुरूप गत असारमा सम्पन्न पार्टीको दशौं राष्ट्रिय महाधिवेशनले पारित गरेको नीति कार्यक्रम र विधान अनुसार जिल्ला अधिवेशनको तयारीमा जुटेको सो पार्टीले जनाएको छ।
नेकपा एसका पोलिटब्यूरो सदस्य तथा रूपन्देही इन्चार्ज नन्दलाल बन्जाडेले आफूहरू एमाले विद्रोहबाट आएकाले त्यसैको निरन्तरता भएकाले जिल्ला अधिवेशन १० औं भनिएको स्पष्ट पारे।
बन्जाडेले महाधिवेशनको कार्यदिशा, कार्यक्रम, संगठनात्मक सिद्धान्त र विधान अनुसार अधिवेशन आयोजना गरिएको बताए।
उनले रूपन्देहीमा जिल्लाको नेतृत्वमा आउन चाहनेहरू प्रतिनिधि अनिवार्य हुनुपर्ने प्रावधानलाई कार्यान्वयन गरिएको बताए।
‘जिल्ला अधिवेशनका लागि रूपन्देही जिल्लाका ५ वटा निर्वाचन क्षेत्रहरूबाट प्रतिनिधिहरू छनोट गर्ने काम सम्पन्न भएको छ, प्रतिनिधि छनोट गर्दा दलिततर्फ १० जना सदस्य बराबर १, खुलातर्फ २० जना बराबर १ र सबै क्लस्टरमा एक तिहाइ महिला र २० प्रतिशत ४० वर्ष मुनिका युवाहरूको सहभागिताको सिद्धान्त अपनाइएको छ,’ बन्जाडेले भने।
नेकपा एस रूपन्देहीका कार्यवाहक अध्यक्ष श्रीराम यादवले अधिवेशनको लागि विधानको पूर्णतया पालना गरिएको बताए।
यादवका अनुसार संघीय निर्वाचन क्षेत्र नं. १ बाट ४६ जना, २ बाट ४३, ३ बाट २१, ४ बाट ११, ५ बाट ७ र मनोनित १३ गरी जम्मा १४१ जना जिल्ला अधिवेशन प्रतिनिधिहरू छनोट गरिएका छन्।
अधिवेशन उद्घाटनका लागि पार्टी अध्यक्ष माधव कुमार नेपाल, महासचिव घनश्याम भूसाल लगायतका नेताहरू आउने उपसचिव टंक पोख्रेलले जानकारी दिए।
-1746009348.jpg)
