राष्ट्रिय प्रजातन्त्र पार्टीका महामन्त्री धवल शम्शेर राणाले नवराज सुवेदीको नेतृत्वमा राजसंस्था पुनर्स्थापनालगायत एजेन्डामा आन्दोलन अघि बढ्ने बताएका छन्।
उनको पार्टी राप्रपाको केन्द्रीय कार्यसम्पादन समिति बैठकले अध्यक्ष राजेन्द्र लिङ्देनको नेतृत्वमा राजसंस्था पुनर्स्थापना लगायतका एजेन्डासहित आन्दोलन गर्ने निर्णय गरिसकेको छ।
तर महामन्त्री राणाले सुवेदीको नेतृत्वमा सबैलाई समेटेर आन्दोलन अघि बढ्ने अभिव्यक्ति दिएका हुन्। सुवेदी नेतृत्वको समितिमा राणा पनि सरिक छन्।
शुक्रबार रिपोर्टर्स नेपालमा भएको कार्यक्रममा बोल्दै महामन्त्री राणाले राजावादी पार्टी र शक्तिहरू एकअर्कालाई सहयोग गर्दै अघि बढ्नुपर्ने बताए।
‘नवराज सुवेदीजीको नेतृत्वमा एउटा छाता बनेको छ, त्यही छाताअन्तर्गत यो सबै भइरहेको छ। हामी सबै पार्टीहरू, दुर्गा प्रसाईंजीहरू पनि। शाही शक्ति, सबै अभियन्ता र पार्टीहरू मिलेर अघि बढ्ने हो,’ आफ्नै पार्टी राप्रपाप्रति लक्ष्य गर्दै उनले भने, ‘कसैले आफ्नो गर्छ भने गर्न दिने, उसलाई सहयोग गर्ने।’
आफू राप्रपाको आन्दोलन परिचालन समिति अध्यक्ष भएको डेढ वर्ष भएको र यसबीचमा धेरै कार्यक्रम गरिएको उनको भनाइ छ।
सुवेदी नेतृत्व समितिमा वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणा सरिक रहेपछि राप्रपा कार्यसम्पादन समितिमा विरोध भएको थियो।
साथै महामन्त्री राणाको अधिकार खुम्च्याउने गरी अध्यक्ष राजेन्द्र लिङ्देनले आन्दोलन परिचालन मूल समितिबाट नै पार्टीका आन्दोलन तय गर्ने निर्णय कार्यसम्पादन समितिबाट गरेका थिए।
महामन्त्री राणाले सुवेदी नेतृत्वमा नै आन्दोलन अघि बढ्ने बताए।
‘नवराज सुवेदीको नेतृत्वमा समिति बनेपछि मेरो जिम्मेवारी यता पनि भयो, म राप्रपामा पनि छु,’ उनले भने, ‘राप्रपा, कमल थापा, शिव सेना सबैले एकअर्कालाई सहयोग गर्ने सहमति छ। आन्दोलन विस्तार गर्ने समिति मेरो अध्यक्षतामा आज बन्दैछ।’
यो पनि:
आन्दोलनको नेतृत्व राजेन्द्र लिङ्देनले आफै लिने, खुम्च्याइयो धवल शम्शेरको भूमिका
रवीन्द्र र धवलले पूर्वराजासँग बढाएको निकटताले राप्रपामा उत्पन्न गरेको तनाव
नवराज सुवेदीलाई प्रश्न-कसले हो तपाईंलाई अघि सारेको?
राजसंस्था फर्काउने आन्दोलनका ‘कमान्डर’ सुवेदीले आत्मकथामा ज्ञानेन्द्र शाह र पञ्चायतबारे लेखेका दुई प्रसंगले राजावादीको मुख रातो
-1746009348.jpg)
