नेपाली कांग्रेसले विष्णु महायज्ञ आयोजना गर्ने नाममा दलित समुदायको घर भत्काउनेलाई कारबाही गर्न सरकारसँग माग गरेको छ।
आइतबार केन्द्रीय कार्यालय सानेपामा बसेको केन्द्रीय कार्यसम्पादन समिति बैठकले सिरहाको औरही गाउँपालिका ५ मा विष्णु महायज्ञ आयोजना गर्ने सन्दर्भमा दलित समुदायका दीपक मल्लिकको घर भत्काउने कार्य निन्दनीय भएको ठहर गरेको हो।
‘विष्णु महायज्ञ आयोजना गर्ने सन्दर्भमा दलित समुदायका दीपक मल्लिकको घर भत्काउने कार्य सामाजिक रूपमा निन्दनीय र कानूनी रुपमा दण्डनीय अपराध हो,’ बैठकपछि कांग्रेसका कार्यवाहक मुख्य सचिव प्रदीप पराजुलीले जारी गरेको विज्ञप्तिमा उल्लेख छ, ‘उक्त घटनाप्रति नेपाली कांग्रेस पार्टी घोर भर्त्सना गर्दै दोषी माथि कार्वाहीको लागि सरकारसँग माग गर्दछ।’
नेपाली समाजमा जातका आधारमा छुवाछूतजन्य भेदभाव गर्नु अत्यन्तै दुःखद घटना भएको पनि कांग्रेसको भनाइ छ।
‘कांग्रेस पार्टी आगामी दिनमा यस प्रकारका भेदभावजन्य कार्यलाई निरुत्साहित गर्न सकारसँग आग्रह गर्दछ। साथै देशैभरि जातीय भेदभाव र छुवाछूतजन्य कार्यका विरुद्ध सामाजिक अभियान सञ्चालनमा लाग्न पार्टी पंक्तिलाई आह्वान गर्दछ,’ निर्णयमा भनिएको छ।
