नेपाली कांग्रेसबाट उम्मेदवार भई स्थानीय तहको प्रमुख र उपप्रमुखमा निर्वाचित भएका जनप्रतिनिधिहरूले विद्यालय शिक्षा विधेयक तत्काल ल्याउन माग गरेका छन्।
नैनसिंह महर प्रमुख रहेको कांग्रेसको शिक्षा विभागले गरेको 'विद्यालय शिक्षा विधेयक र जनप्रतिनिधि सरोकार' अन्तर्क्रियामा बोल्दै जनप्रतिनिधिहरूले विद्यालय शिक्षा विधेयक हिउँदे अधिवेशनबाट ल्याउनुपर्ने बताएका हुन्।
कांग्रेस शिक्षा विभागले स्थानीय तहका प्रमुख, उपप्रमुख र अध्यक्ष, उपाध्यक्षलाई बोलाएर काठमाडौंमा छलफल गरेको थियो।
विभाग प्रमुख महरले स्थानीय तहका प्रमुख, उपप्रमुखले शिक्षा विधेयकमा दिएको सुझाव पार्टीलाई बुझाउने र शिक्षा विधेयकमा ती सुझाव समेटन पहल गरिने बताए।
'स्थानीय प्रतिनिधिहरूको धारणा के छ, विद्यालय शिक्षा विधेयकमा के सुधार गर्नुपर्ने छ र कांग्रेसबाट विधेयकका विषयमा बोक्नुपर्ने एजेन्डा के-के हुन् भन्ने विषयमा छलफल गर्दै सुझाव संकलन गरेका छौं। उहाँहरू सबैले शिक्षा क्षेत्रलाई व्यवस्थित बनाउन जसरी पनि हिउँदे अधिवेशनमै शिक्षा विधेयक ल्याउनुपर्नेमा जोड दिनु भएको छ,' महरले भने।
शिक्षा प्रणाली र यसका आयाममा विश्वव्यापी परिवर्तन भइरहेका बेला आफूहरूको नीति र प्राथमिकतामा पनि रूपान्तरण आवश्यक रहेको उनले बताए। 'राष्ट्रिय आवश्यकतामुखी एवं अन्तर्राष्ट्रिय परिवेश सुहाउँदो शिक्षाका लागि नीतिमा सामयिक सुधार जरूरी छ,' महरले भने।
छलफलमा उपप्रधानमन्त्री एवं सहरी विकास मन्त्री प्रकाशमान सिंहले नेपाली समाजलाई असल बाटोमा डोर्याउन गुणस्तरिय शिक्षामा जोड दिनुपर्ने बताए।
राम्रो शिक्षा दिन सके समाजमा जिम्मेवार, असल नागरिक उत्पादन हुने उनको भनाई छ। शिक्षाले नै समाजलाई परिवर्तनको बाटो लैजाने सिंहले बताए।
विभागले विद्यालय शिक्षा विधेयकबारे पहिलो चरणमा पार्टी सभापति शेरबहादुर देउवालगायत पदाधिकारीसँग छलफल गरेको थियो। दोस्रो चरणमा सरोकारवालासँग पार्टी मुख्यालय सानेपामा छलफल भएको थियो।
