गणतन्त्र पक्षधर दलहरूले काठमाडौंको तीनकुनेमा चैत १५ गते भएको घटनाको मुख्य जिम्मेवार पूर्वराजा ज्ञानेन्द्र शाह रहेको निष्कर्ष निकालेका छन्।
प्रधानमन्त्री केपी शर्मा ओलीको आह्वानमा आइतबार बेलुका बालुवाटारमा बसेको गणतन्त्र पक्षधर दलहरूको बैठकले तीनकुनेमा राजावादीहरुले गरेको हिंसात्मक प्रदर्शन र त्यसबाट भएको क्षतिको जिम्मा पूर्वराजाले लिनुपर्ने निष्कर्ष निकालेको हो।
बैठकको निर्णय सुनाउँदै गृहमन्त्री रमेश लेखकले तीनकुनेको घटना षड्यन्त्रमूलक रहेको र त्यसको जिम्मेवार पूर्वराजा ज्ञानेन्द्र रहेकामा बैठकमा सहभागी सबै दलका नेताहरू एकमत रहेको बताए।
'लोकतान्त्रिक शासन व्यवस्थालाई उल्ट्याउने नेपालको संविधानलाई समाप्त पार्ने जुन गतिविधि भएका छन्, यो षड्यन्त्रमूलक गतिविधिको मुख्य जिम्मेवार पूर्वराजा ज्ञानेन्द्र हुन् भन्ने कुरामा सबै दलहरूको एकमत रहेको छ,' उनले भने।
बैठकमा लोकतान्त्रिक गणतन्त्र र संविधानका विरूद्ध भएका त्यस्ता गतिविधिहरुको समीक्षा भएको उनले बताए। साथै व्यवस्था र संविधान रक्षाका निम्ति सबै एकजुट हुनुपर्ने निष्कर्ष रहेको पनि उनले बताए।
'यो संविधानको रक्षा गर्ने कुरामा हामी एकमत छौं। संघीय लोकतान्त्रिक शासन व्यवस्थाको रक्षा गर्ने र यसै व्यवस्थामार्फत नागरिकलाई थप सुविधा प्रदान गर्ने र मुलुकलाई समृद्धी तर्फ लैजाने कुरामा एकमत छौं । सबैको निष्कर्ष रह्यो,' उनले भने।
बैठकले तीनकुनेको घटनामात्रै नभई फागुन ७ गते यता त्यस्ता प्रवृत्तीका गतिविधिबारे समीक्षा गरेको मन्त्री लेखकले बताए।
'फागुन ७ गतेयता घटनाक्रम र पछिल्लो समय चैत १५ गते तीनकुनेमा भएको अमानवीय, बर्बर्तापूर्ण र आततायी प्रवृत्तिको घटना भएका छन्। घरमा मान्छे छ भन्ने थाहा हुँदा हुँदै आगो लगाइयो। एकजना पत्रकारको जलेर मृत्यु भयो। त्यसरी नै अर्को एकजनाको मृत्यु भएको छ। स्थितिलाई नियन्त्रणमा लिन केही बल प्रयोग गर्दा मृत्यु भएको छ। ती दुःखद घटना हो,' उनले भने।
संचारगृह र उद्योग व्यापारिक प्रतिष्ठानमाथि आक्रमण, संघीयता, गणतन्त्र र लोकतन्त्र पक्षधर पार्टीका कार्यालयमा आक्रमण भएका र नेताहरुका घरमा आक्रमण भएका लगायत सम्पूर्ण आपराधिक कार्यहरूबारे बैठकमा उपस्थित दलका नेताहरूले भर्त्सना गरेको उनले बताए।
'सबै दलका नेताहरुले भर्त्सना गर्नुभयो। र त्यस्ता आपराधिक गतिविधिमा संलग्नहरूलाई कडा भन्दा कडा कारबाही गर्नुपर्छ भन्नेमा सबै दलहरू एकमत रहेको स्थिति छ,' उनले भने।
गृहमन्त्री लेखकले संविधान विरोधी गतिविधिहरू, व्यवस्था विरोधमा हुने कुनै पनि षड्यन्त्रलाई सहन नगरिने बताए ।
