कार्यवाहक प्रधानमन्त्री प्रकाशमान सिंहले सर्वसाधारणको सबै बचत सहज रूपमा फिर्ता गराउन सहकारी अभियानले थप दायित्वबोध गर्नुपर्ने बताएका छन्।
६८ औं राष्ट्रिय सहकारी दिवसका अवसरमा बुधबार काठमाडौंका आयोजित कार्यक्रमलाई समबोधन गर्दै उनले सहकारीका सदस्यहरू पीडित बन्ने अवस्था आउनै नहुने बताए।
उनले सहकारी मर्यादित हुनुपर्ने पनि बताए।
‘नेपालमा रहेका ३१ हजारभन्दा बढी सहकारी संस्थाहरूमध्ये विगत केही समयदेखि केही सयको संख्यामा रहेका सहकारी संस्थामा सर्वसाधारण जनताको बचत रकम फिर्ताको समस्या देखिएको छ। सहकारीमा सदस्यहरू नै केन्द्रीय तत्व हुन्छन् उनीहरू पीडित बन्नुपर्ने अवस्था आउनै हुँदैन। तसर्थ केही सय सहकारीमा मात्र देखिएको समस्या हो भनेर हामी चुप बस्न सक्दैनौँ। हाम्रा प्रयासहरुलाई अझ धेरै प्रभावकारी बनाउन नेपाल सरकार प्रतिबद्ध छ,’ उनले भने।
हालै सहकारी ऐनमा समसामयिक संशोधन गरी राष्ट्रिय सहकारी नियमन प्राधिकरणको स्थापनाका साथै अन्य व्यवस्था गरी सहकारी क्षेत्रमा देखिएका समस्या समाधान गर्न र सहकारी क्षेत्रमा सुशासन कायम गर्न सरकार कटिबद्ध रहेको पनि उनले बताए।
‘सर्वसाधारणको सबै बचत सहज रूपमा फिर्ता गराउन सहकारी अभियानले पनि थप दायित्वबोध गरोस्,’ उनले भने।
सहकारी आफैमा आर्थिक, सामाजिक जागरणको अभियान पनि भएको भन्दै उनले संविधानले सहकारी क्षेत्रलाई गरिबी न्यूनीकरण, आत्मनिर्भर, दिगो एवं समाजवाद उन्मुख राष्ट्रिय अर्थतन्त्रको एक महत्वपूर्ण आधार स्तम्भको रूपमा स्वीकार गरेको बताए।
