काठमाडौं महानगरपालिकामा प्रमुख प्रशासकीय अधिकृतलाई कार्यकक्ष प्रवेशमा रोक लगाइएपछि उपमेयर सुनिता डंगोलले बैठक सुरू गरेकी छन्।
महानगर प्रमुख बालेन शाह उपस्थित नभएपछि उपमेयर डंगोलले प्रमुख प्रशासकीय अधिकृतलाई राखेर बैठक सुरू गरेकी हुन्। बैठकमा महानगरकाका प्रमुख प्रशासकीय अधिकृत सरोज गुरागाईं र वडाध्यक्षहरू सहभागी छन्।
मेयर बालेनले प्रमुख प्रशासकीय अधिकृतको कार्यकक्षमा ताला लगाइदिएका थिए। बिहीबार प्रमुख प्रशासकीय अधिकृत गुरागाईंलाई वडाध्यक्ष र कर्मचारीहरूले ठेलमठेल गरी कार्यालय प्रवेश गराएका थिए।
कार्यकक्षमा लगाइएको ताला फोड्न खोज्दा महानगर प्रहरीले रोकेको थियो। ताला तोड्ने क्रममा ढोकाको सिसा पनि फुटेको थियो।
प्रमुख प्रशासकीय अधिकृतलाई प्रवेश गर्न नदिइएपछि उपप्रमुख डंगोलले तत्काल बैठक राखेकी थिइन्।
बैठकको सुरूवातमै उनले मन्त्रालयले पठाएको प्रमुख प्रशासकीय अधिकृत हाजिर हुन आउँदा झडपको अवस्था उत्पन्न हुनु राम्रो नभएको बताइन्।
‘मन्त्रालयबाट पठाएपछि प्रमुख प्रशासकीय अघिकृत हाजिर गर्न आउनु भएको छ,’ उपमेयर डंगोलले भनिन्, ‘उहाँ हाजिर गर्न आउँदा यो झडपको अवस्था हुनु राम्रो कुरा होइन । कर्मचारी–कर्मचारीबिच लडाइ हुनु पनि राम्रो होइन।’
परिस्थिति असामान्य बनेपछि मेयर नै बैठकमा उपस्थित हुनुपर्ने पनि उनले बताइन्।
काठमाडौं टावर निर्माण गर्ने नक्सा पासको विवाद बढ्दै गएपछि प्रमुख प्रशासकीय अधिकृत गुरागाईंलाई काठमाडौं महानगरपालिकाले कार्यालय छिर्न रोक लगाएको थियो।
मेयर बालेन शाहले संघीय सरकारलाई नयाँ प्रमुख प्रशासकीय अधिकृत पठाइदिन आग्रह गर्दै आएका थिए भने संघीय मामिला तथा सामान्य प्रशासन मन्त्रालयले गुरागाईंलाई नै काममा लगाउन आग्रह गर्दै आएको थियो।
सोही अनुसार तीन महिना १४ दिनपछि महानगर पुगेका प्रमुख प्रशासकीय अधिकृत सरोज गुरागाईंलाई वडाध्यक्षहरू र कर्मचारीहरूले बिहीबार कार्यालय परिसरबाट कार्यकक्षसम्म पुर्याएका थिए। उनलाई रोक्न मेयर बालेनले नगर प्रहरीहरू खटाएका थिए भने कार्यकक्षमा ताला समेत लगाइएको थियो।
कार्यकारी कार्यालय प्रवेश गर्न खोज्दा मेयर बालेन शाहले कार्यकक्षमै चाबी लगाइदिएको भेटिएपछि उपमेयर डंगोलले समाधान खोज्नुपर्ने बताएकी हुन्।
बैठकमा उमेयर डंगोल र उपस्थित सबै वडाध्यक्षहरूले बिहीबार कर्मचारी प्रवेशको घटनालाई लिएर मेयरले देखाएको भूमिकाको आलोचना गरे।
उपमेयर डंगोलले हरेक घटनाक्रमबारे सबै जनप्रतिनिधि जानकार रहेको बताउँदै मेयरलाई कोठामा बसेर निर्देशन नदिन भनिन्।
‘यो तमासा हामीले हेर्नुपर्ने ? मेयरको आदेश हो भने मेयर अघि आउनुपर्छ । होइन भने कोठामा बसेर आदेश दिन पाइँदैन,' उनले भनिन्।
तत्कालका लागि प्रमुख प्रशासकीय अधिकृतलाई हाजिर गर्ने व्यवस्था मिलाएर हजारौं कर्मचारी र लाखौं काठमाडौंवासीले खेप्नुपेको सास्ती हटाउन पहल गर्नुपर्ने उपमेयर डंगोलको भनाइ थियो।
'क्यान्सर पीडितलाई पनि हामीले पैसा दिन सकेका छैनौँ । अझै छानबिन गर्नुपर्ने भए गर्ने हो । तर, यो पीडामा राख्नु हुँदैन,’ उनले भनिन्।
प्रवक्ता नविन मानन्धरलगायत सबै वडाध्यक्षले पनि मेयर साहको चर्को आलोचना गरे।
नगरप्रहरी प्रमुख राजु पाण्डेलाई उपप्रमुख डंगोलले ताला किन लगाएको भनेर प्रश्न गरेपछि मेयरको मौखिक आदेशमा लगाएको बताएका थिए।
