नेपाली कांग्रेसका महामन्त्री विश्वप्रकाश शर्माले समाजमा रहेका असन्तुष्टिलाई निराशाको भाष्य बनाएर जनतालाई मनोवैज्ञानिक रूपमा कमजोर बनाउने काम भइरहेको बताएका छन्।
नेपाली कांग्रेस दाङको तेस्रो जिल्ला सम्मेलनलाई शुक्रबार सम्बोधन गर्दै महामन्त्री शर्माले त्यस्ता गलत भाष्य चिर्न कार्यकर्ताहरूसँग आग्रह गरे।
'जनताले राजा होइन, रासायनिक मल खोजेका छन्,' प्रतिनिधिसभा सदस्य शर्माले भने, 'प्रभावकारी र आत्मसम्मान सहितको सेवा खोजेका छन्।'
असन्तुष्टि चिर्न जनप्रतिनिधिहरूले इमानदारीपूर्वक काम गर्नुपर्ने उल्लेख गर्दै उनले भने, 'आगामी चुनावमा तपाईंलाई नागरिकले आफै रोजून्। तपाईंहरूले राम्रो काम गरे हामीले पनि राम्रो कुरा भन्न मिल्छ।'
कतिपयले वर्षैपिच्छे सरकार फेरिन्छ, बरू राजा आए स्थिरता होला भन्ठान्छन् भने त्यो सोच गलत भएको महामन्त्री शर्माले बताए।
'तीस वर्षसम्म राजाको शासन बेला १६ वटा र ज्ञानेन्द्र शाहका पालामा तीन वर्षमै चारवटा सरकार बने। त्यसैले राजा आउँदैमा स्थिरता हुँदैन। लोकतान्त्रिक गणतन्त्रभित्रैबाट स्थिरता ल्याउने पद्धतिबारे हामी प्रस्ताव गरिरहेका छौं,' उनले भने, 'चुनावमा जुन दल पहिलो हुन्छ, त्यसले नै सरकारको नेतृत्व गर्ने विधि बसाल्न आवश्यक छ। दोस्रो, तेस्रो वा चौथो दलले च्याँखे थापेर मलाई गृह मन्त्रालय नै चाहियो भन्ने प्रवृत्ति अन्त्य हुनुपर्छ। उनीहरू सरकारभन्दा बाहिरै बस्नु उपयुक्त हुन्छ।'
बहुमत सांसदले छानेको व्यक्ति प्रधानमन्त्री बन्ने र दुई वर्षपछि फेरि संसदमा विश्वासको मत लिने विधि अपनाउनुपर्ने उनले बताए।
'विश्वासको मत माग्न निश्चित सूचक बनाउन सकिन्छ। प्रतिव्यक्ति आम्दानी, भ्रष्टाचार नियन्त्रण, सुशासन, बजेट खर्च लगायतका आधारमा विश्वासको मत पाएपछि फेरि थप दुई वर्ष सरकार चलाउन पाउने विधि अपनाउन सकिन्छ,' शर्माले भने।
उनले एक, दुई, तीन र चारको विधिमा जान उपयुक्त हुने सुझाव दिँदै भने, 'एकपटक राष्ट्रपति भएपछि दोस्रोपटक हुन नपाउने, दुईपटक प्रधानमन्त्री भएपछि तेस्रोपटक हुन नपाउने र तेस्रोपटक सांसद भएपछि चौथोपटक हुन नपाउने विधि अवलम्बन गरिनुपर्छ।'
कतिपयले नयाँ दलहरूमा राम्रो संस्कार रहेको तर्क गरे पनि त्यस्तो नदेखिएको उनको भनाइ छ। रास्वपालाई लक्ष्य गर्दै उनले भने, 'त्यो त हाम्रा लागि पनि उदाहरणीय र प्रशंसनीय थियो। हाम्रा लागि पनि दबाब थियो। तर त्यसपछि त्यो उदाहरण उहाँहरूले नै भत्काई सक्नुभयो।'
कतिपयले पुराना दलभन्दा बढी संस्कार राजासँग छ भन्ने गरेको प्रसंगमा उनले त्यो बुझाइ पनि सही नभएको बताए।
'बिपी कोइरालाको नेतृत्वमा देशमा सशस्त्र क्रान्ति भयो। बिपीले अदालतमा उभिएर भन्नुभयो — यी प्रत्येक घटनामा मेरो संलग्नता थिएन, तर मेरो आह्वानमा भएका प्रत्येक घटनाका हिंसाको जिम्मेवारी म लिन्छु। यो हो नि लोकतान्त्रिक संस्कार भनेको,' उनले भने।
'तीनकुनेमा भएको हिंसात्मक प्रदर्शनको जिम्मा पूर्वराजाले लिए त? त्यस दिन प्रदर्शनमा ज्यान गुमाएका सविन महर्जनकी श्रीमतीको सिउँदो पुछिँदै गरेको घटनाले ज्ञानेन्द्रलाई छोयो त? लाइभ गर्दागर्दै आगोमा जलेर बितेका पत्रकारकी आमाको चित्कारले छोयो त? पूर्वराजाले एउटा वक्तव्य निकालेर 'त्यो प्रदर्शन आफ्नो आह्वानमा भए पनि धनजनको क्षतिप्रति दुःख व्यक्त गर्छु' सम्म भनेको सुनिएन। त्यसैले गाउँमा कसैले 'राजा चाहिन्छ' भने कांग्रेसजनले कस्तो राजा चाहिएको भनेर प्रश्न सोधेर उदाहरण दिन सक्नुपर्छ।'
नेता तथा कार्यकर्ताहरूमा २०८४ सालको चुनावपछि मात्र पार्टीको महाधिवेशन हुन्छ कि भन्ने शंका रहे पनि त्यो चिन्ता नलिन शर्माले आग्रह गरे।
'नेपाली कांग्रेस विधि र विधानअनुसार चल्ने पार्टी हो,' महामन्त्री शर्माले भने, 'कांग्रेस नयाँ ढंगबाट अगाडि बढ्ने प्रयत्नमा छ। अझ भनौं अगाडि बढिसकेको छ। कतिपय परम्परागत कार्यशैलीमा नवीनता आइसकेको छ।'
पार्टीले ५६ वटा विभाग बनाएर कार्यशैलीमा नवीनता ल्याएको र नयाँ अभियानका साथ काम गरिरहेको उनले बताए। अधिवेशन हुन बाँकी रहेका भ्रातृ संगठनका अधिवेशन पनि छिट्टै हुने उनले उल्लेख गरे।
-1756794700.JPG)
-1746009348.jpg)
