प्रधानमन्त्री केपी शर्मा ओलीले विधेयकहरुमा जस्तो पायो त्यस्तै विधेयक पारित नगर्न आफ्नो दल नेकपा (एमाले)का सांसदहरूलाई निर्देशन दिएका छन्।
शनिबार बानेश्वरमा बसेको नेकपा एमालेको संसदीय दलको बैठकमा प्रधानमन्त्री ओलीले चालु अधिवेशनले वर्षभरिको राजनीति,अर्थतन्त्र, समाज र संस्कृतिलाई गाइड गर्ने भएकाले ठीक ढंगले पारित गर्नुपर्ने बताएका हुन्।
'विधेयक जसो पायो, त्यसै पारित हुन नदिनुस्। पारित हुनु हुँदैन । ठिक विधेयक पारित हुनुपर्दछ । ठिक ढंगले पारित हुनुपर्दछ । विधेयक ठिक पारित भएन भने गलत विधेयकले देशलाई वैचारिक हिसावले गलत दिशामा लैजान सक्छ । व्यवहारिक हिसावले गलत दिशामा लैजान सक्छ । जसको प्रत्यक्ष असर जनतालाई सेवा सुविधा पुर्याउने कुरामा हुन्छ,' उनले भने।
उनले विधेयकहरू आत्मकेन्द्रित भएर नभई राष्ट्र केन्द्रित र जनताप्रति समर्पित भएर टुंगो लगाउनुपर्ने बताए ।
'यिनलाई सही ढंगले निस्कर्षमा पुर्याउनुपर्छ। हामीले थुप्रै विधेयकहरु यस अधिवेशनबाट पारित गर्नुपर्नेछ,' उनले भने।
प्रधानमन्त्री ओलीले उद्यमी व्यवसायीलाई अप्ठ्यारो पार्ने कुरा, विकासका कुरामा अफ्ठ्यारो पार्ने कुरामा, मजदुर किसानलाई अफ्ठ्यारो पार्ने कुरामा ध्यान दिनुपर्ने बताए।
'जस्तो पनि पास गरिदिएर हुँदैन । पास गर्नु त हो नि भनेर हुँदैन । हामी अत्यन्तै चनाखो हुनुपर्दछ । देश र जनतको पक्षमा विधेयक पास गर्नुपर्दछ,’ उनले भने।
प्रधानमन्त्री ओलीले एमसिसी अब नआउनसक्ने भन्दै एमसिसी आएन भने सहेर अघि बढ्नुको विकल्प नरहेको बताए। राष्ट्रका बीचमा गरिएका सम्झौताहरु आफ्नो देशको कानून भन्दा माथि हुने जिकिर गरे।- न्युज एजेन्सी नेपाल
