नागरिक उन्मुक्ति पार्टी (नाउपा)का संरक्षक रेशम चौधरी पक्राउ परेको घटनाबारे गृहमन्त्री रमेश लेखकले जवाफ दिएका छन्।
बिहीबार प्रतिनिधि सभाको बैठकमा उठेका प्रश्नका जवाफ दिनेक्रमा गृहमन्त्री लेखकले संरक्षक चौधरीलाई प्रहरीले पक्राउ गरी डिल्लीबजार कारागार चलान गरेको विषयमा जवाफ दिएका हुन्।
वैशाख १७ गते सर्वोच्च अदालतको मुद्दा तथा रिट महाशाखामा कार्यरत महिमानसिंह विष्टले अनधिकृत पत्र लेखेर चौधरीलाई पक्राउ गर्न लगाएका थिए। चौधरीलाई त्यही अनधिकृत पत्रकै आधारमा प्रहरीले पक्राउ गरी कारागार चलान गरिएको थियो।
यस विषयमा गृहमन्त्री लेखकले अधिकृतले आफ्नो विवेक बाहिर गएर अनधिकृत पत्र लेखेका कारण चौधरी पक्राउ परेको सदनमा जानकारी गराएका थिए।
उनले यस घटनाप्रति दु:ख समेत व्यक्त गरेका हुन्।
‘सर्वोच्चमा कार्यरत अधिकृतले सामान्य विवेक बाहिर गएर अनधिकृत पत्रका कारण नागरिक उन्मुक्ति पार्टीका संरक्षक रेशम चौधरी पक्राउ परेको घटनाप्रति दु:ख व्यक्त गर्दछु,’ उनले भने।
उनले प्रहरीले कुनै पनि गलत नियत राखेर चौधरीलाई पक्राउ नगरिएको र सही नियतले नै कानुनको कार्यान्वयन गर्ने मनसायबाहेक अन्य पूर्वाग्रह नरहेको पनि बताए।
‘यसअघि अदालतबाट हुने गरेका पत्राचारलाई प्रहरी प्रशासनले तत्काल कार्यान्वयन गरेझैँ यस घटनामा पनि सही नियतले कानुनको कार्यान्वयन गर्ने मनसायबाहेक कुनै पूर्वाग्रह नरहेको सम्मानित सदनसमक्ष अनुरोध गर्न चाहान्छु,’ उनले भने, ‘भविष्यमा यस्ता घटना नदोहोरिने तर्फ सबैलाई सजक र सचेत बनाएको ब्यहोरासमेत अनुरोध गर्न चाहान्छु।’
त्यसदिन रेशम चौधरीलाई पक्राउ गराउनका लागि अधिकृत महिमानसिंह विष्ट सर्वोच्च अदालतको फैसला कार्यान्वयन गर्ने पत्र लिएर प्रहरी प्रधान कार्यालय नक्सालमा पुगेको पनि मन्त्री लेखकले बताए।
त्यसदिन महानिरीक्षक दीपक थापालाई भेटेर विष्टले फैसला कार्यान्वयन गराउनका लागि उपस्थित भएको भन्दै महानिरीक्षक थापासँग अनुरोध गरेको र त्यसअनुसार नै जिल्ला प्रहरी परिसर काठमाडौंलाई पत्राचार भएको पनि उनले बताए।
‘जानकारी प्राप्त गर्न बित्तिकै मैले सर्वोच्च अदालतका रजिष्ट्रारलाई फोन गरी विषय वस्तुका पत्राचारको विषयमा सोधपुछ गरे। सुरूमा रजिष्ट्रारले यो विषयमा अनभिज्ञता प्रकट गर्दै थप विषय बुझेर खबर गर्ने बताउनुभयो,’ मन्त्री लेखकले भने, ‘पछि उहाँले उक्त पत्र अदालतको आधिकारिक नभएको र अदालतबाट थप छानबिन भइरहेको बताउनुभयो। केही समयपश्चात सम्मानित अदालतको विज्ञप्तिमार्फत उक्त पत्र आधिकारिक नभएको जानकारी गराइएको र कारागार कार्यालय डिल्लीबजारलाई समेत पत्र लेखेर चौधरी तत्काल रिहा हुनुभएको हो।’
उक्त घटनापछि जिल्ला प्रहरी परिसर काठमाडौंले शाखा अधिकृत विष्टलाई पक्राउ गरी अनुसन्धान गरिरहेको छ।
