सत्तारूढ नेकपा (एमाले)का सांसद योगेश भट्टराईले नेपालले छोटो समयमै प्रगति गर्न सक्ने पाँच क्षेत्रमा लगानीको प्रोत्साहन गर्नुपर्ने बताएका छन्।
शुक्रबार प्रतिनिधि सभामा बजेटको सिद्दान्त र प्राथमिकताका विषयहरूमाथिको छलफल क्रममा सांसद भट्टराईले छोटो समयमै नेपालले प्रगति र लाम लिन सक्ने पाँच क्षेत्रहरू प्रस्तुत गर्दै त्यसमा लगानी बढाउनुपर्ने बताएका हुन्।
उनले उच्च मूल्यका कृषि, खनिज र जडिबुटी, सूचना प्रविधि, पर्यटन, जलस्रोत र शिक्षा तथा स्वास्थ्य क्षेत्र छोटो समयमै लाभ लिन सकिने क्षेत्रका रूपमा प्रस्तुत गरेका छन्।
'यी क्षेत्रमा लगानीलाई प्रोत्साहन गरौं, बिस्तारै नेपालमै केही गर्न सकिन्छ भन्ने भाष्य स्वतः स्थापित हुनेछ,' उनले भने।
भट्टराईले नेपाललाई मेडिकल शिक्षा र स्वास्थ्य सेवाको हब नै बनाउन सकिने बताए। त्यस क्षेत्रबाट बार्षिक १० खर्ब भन्दा बढी विदेशी मुद्रा आर्जन गर्न र लाखौंको संख्यामा नयाँ रोजगारी सिर्जना गर्न सकिन्छ भन्ने अध्ययनले नै देखाएको उनको दाबी छ।
उनले आगामी बजेटमा पुँजीगत खर्च गर्ने नसक्ने र बजेट फ्रिज हुने अवस्था अन्त्य गरिनुपर्ने बताए। खर्च गर्ने मन्त्रालयमा बजेट कम हुने र खर्चै गर्न नसक्ने मन्त्रालयमा बजेट थुप्रने अवस्था अन्त्यका लागि अर्थ मन्त्रालयल 'वार रूम' स्थापना गर्नुपर्ने उनले बताएका छन्।
त्यस्तै तीन करोडभन्दा साना आयोजनामा संघबाट बजेट विनियोजन गर्ने भन्ने नीतिलाई कार्यान्वयन गर्नुपर्ने पनि उनको सुझाव छ। कम बजेटमा राम्रो प्रतिफल दिने आयोजनालाई ध्यान दिँदै ८० प्रतिशत ठूला र २० प्रतिशत अन्य परियोजनामा विनियोजन गर्न प्रणाली स्थापना गर्नुपर्ने उनको भनाइ छ।
संघीय सांसदहरूलाई विकास आयोजनामा जोड्न सके बजेट कार्यान्वयनमा सबैको जबाफदेहिता स्थापित हुने पनि सांसद भट्टराईको तर्क छ।
सरकारी ठेक्का समयमै नसकिने र सकिएका ठेक्काको भुक्तानी नहुने चक्रबाट बाहिरि निस्कन अर्थमन्त्रालय र निर्माण व्यवसायीबीच परफरमेन्स एन्ड पेमेन्ट अटोमेश लागु गर्नेपर्ने भट्टराईको सुझाव छ।
छलफलमा सांसद भट्टराईले बजेटको सिद्दान्त तथा प्राथमिकताका विषयहरू सीमित स्रोत साधनले असीमित अपेक्षा पूरा गर्नुपर्ने चुनौतीबीच सकारात्मक रहेको बताए। उनले त्यस सम्बन्धमा विभिन्न २४ वटा सुझाव प्रस्तुत गरेका थिए।
