दाङ जिल्ला अदालतले बलात्कारका छुट्टाछुट्टै घटनामा तीन जना आरोपीलाई कैद र जरिवाना फैसला सुनाएको छ।
बलात्कारका फरक फरक घटनामा सल्यानको वनगाड कुपिन्डे नगरपालिका–९ रातामाटा का ३८ वर्षीय कुलबहादुर बस्नेत, दाङकै तुलसीपुर उपमहानगरपालिका– १६ घर भई तुलसीपुर – ४ मा बस्दै आएका कर्णबहादुर केसी र गढवा गाउँपालिका – ४ का ५२ बर्षीय लाहानु चौधरीलाई कैद र जरिवाना फैसला गरेको हो।
न्यायाधीश लालसिंह थापाको इजलासले बस्नेतलाई दस वर्ष कैद, पाँच लाख जरिवाना, पीडितको नाममा २५ हजार क्षतिपूर्तिस्वरूप र २० हजार पीडित राहतकोषमा जम्मा गर्न फैसला गरेको अदालतका सूचना अधिकारी गोकर्ण वलीले बताए।
तुलसीपुरकै १६ वर्षीया किशोरीलाई बलात्कार गरेको घटनामा उनलाई अदालतले वैशाख ४ गते नै दोषी ठहर गरेको थियो। २०८० चैत २५ गते राति नाबालिकामाथि बलात्कार भएको घटनामा उनीविरूद्ध २०८१ वैशाख १६ गते जबर्जस्तीकरणी सम्बन्धी मुद्दा चलेको थियो ।
बिहीबार नै न्यायाधीश प्रतिमा पोखरेलको इजलासले ९ वर्षअघिको बलात्कार घटनाको फैसला गरेको छ। २०७३ माघ ३ गते सुस्तमनस्थितिकी महिलालाई बलात्कार गरेको घटनामा न्यायाधीश पोखरेलले अभियुक्त कर्णबहादुर केसीलाई दस वर्षको कैद फैसला सुनाएको छ। कर्णबहादुर फरारकै सूचीमा छन्।
उनीविरूद्ध दस वर्ष कैद र पीडित राहात कोषमा ५० हजार जम्मा गर्न फैसला सुनाएको हो। एक जना सुस्त मनस्थितिकी महिला माथि बलात्कार गरेको उजुरी पछि केसी पक्राउ परेका थिए । सुस्त मनस्थितिकी महिलालाई बलात्कार गरेको हुँदा केसीलाई पाँच वर्ष थप सजाय जोडेर दस वर्षको सजाय हुने अदालतका सूचना अधिकारी वलीले बताए ।
न्यायाधीश तेजनारायण पौडेलको इजलासले २०७६ मा भएको बलात्कार घटनाको मुद्दामा लाहानु चौधरीलाई ९ बर्ष जेल सजाय तोकेको छ ।
अदालतका सूचना अधिकारी गोकर्ण वलीका अनुसार चौधरीले एक जना बोल्न नसक्ने महिलालाई बलात्कार गरेको उजुरी प्रहरीमा परेको थियो । चौधरी पनि हाल फरार छन्।
-1742801159.jpg)
