प्रधानमन्त्री केपी शर्मा ओलीले पूर्वराजा ज्ञानेन्द्र शाहलाई घरमै सिंहासन बनाएर राख्न राजावादीहरूलाई सुझाव दिएका छन्।
देश लोकतान्त्रिक गणतन्त्रमा गइसकेको भन्दै प्रधानमन्त्री ओलीले लोकतान्त्रिक व्यवस्था ल्याइसकेकाले राज सिंहासनको व्यवस्था नभएको बताए।
‘देशमा जेठ १५ गते राजालाई सिंहासनमा राख्छन् रे, घरमै सिंहासन बनाएर राख,’ उनले भने, ‘देशको सिंहासन गयो। देशमा राज सिंहासनको कल्पना, कस्तो दिमाग होला भन्या।’
नेपाली जनताले राजतन्त्र उल्ट्याएर फालेको भन्दै उनले नयाँ सविधानअनुसार लोकतान्त्रिक व्यवस्था देशमा रहेको बताए।
‘नेपाली जनताले राजतन्त्र उल्ट्याएर फालिसक्यो। कहाँ हराइसक्यो। संविधान अर्को बनिसक्यो। संसद छ। राष्ट्रपति छ। न्यायालय छ। व्यवस्था छ, लोकतान्त्रिक र हामी छौं,’ उनले भने।
राजतन्त्रले जथाभावी मानिस मार्दै हिडेको उनले बताए। राजतन्त्रलाई खोरमा थुनेर निकालेर फालेर आफुहरू रहेको उनले बताए।
‘जसले जंगलमा घुमेर जथाभावी जसलाई पायो त्यसलाई समाउँदै, पछार्दै, मार्दै खादै हिडेको राजतन्त्रलाई समाएर खोरमा हालेर, खोरबाट पनि निकालेर मुन्ट्याएर फ्याकिदिएका छौं,’ उनले भने।
राजावादीले जेठ १५ गतेदेखि निर्णायक आन्दोलन गर्ने उद्घोष गरेको भन्दै उनले जेठ १५ गतेपछि अर्को १५ गते मिति तोक्ने पनि उनले बताए।
‘राजतन्त्र ल्याउँछौ रे १५ गते। कस्ता सपना देख्छन् उनीहरु। जेठ १५ गते पछि अर्को १५ गते भन्छ। अस्ति बैशाख ११ गते ल्याउँछौ भने। बेशाख ११ गते युवाहरुले खुशीयाली दिवस मनाए,’ उनले भने।
राजाले घुडा टेकेको दिन काठमाडौंमा युवा संघले युवा उत्सव मनाएको भन्दै उनले जनताका लोकतान्त्रिक अधिकार पुनस्थापित भएका दिनका रुपमा बैशाख ११ गतेलाई युवाहरुले उत्सब मनाएको उनले बताए।
‘वैशाख ११ गते राजाले घुडा टेकेको दिन। जनताका बलजफ्ती खोसएका अधिकार फिर्ता दिएको दिन युवाहरूले उत्सवका रूपमा मनाए,’ उनले पूर्वराजा प्रति लक्षित गर्दै भने, ‘संविधानमा बस्छु भनेर कायलनामा गरेर संसद पुनर्थापना गरेको दिन थियो।’
राजतन्त्र फर्काउने भनेर गर्न खोजिएको आन्दोलनप्रति कोही पनि भ्रममा नपर्न उनले आह्वान गरे।
एमालेका अध्यक्षसमेत रहेका ओलीले नेपाल प्रज्ञा प्रतिष्ठानका पूर्वउपकुलपति जगमान गुरूङलाई पनि कटाक्ष गरे। गुरूङलाई ओलीले नै प्रतिष्ठानका उपकुलपति नियुक्त गरेका थिए।
‘मैले पनि गुरूजी गुरूजी भनेर प्रज्ञा प्रतिष्ठानका मैले पनि गुरूजी गुरूजी भनेका। प्रज्ञा प्रतिष्ठानका उपकुलपति बनाएका गुरूङजी ज्योतिष हेर्नुहुन्थ्यो,’ उनले भने, ‘ज्ञानेन्द्रको कुण्डली हेर्नुभयो रे। राजाइ भइहाल्नुभयो रे। मेरो कुण्डली पठाइदिन्छु हेर्नुस् अनि थाहा पाइहाल्नुहुन्छ।’
युवा संघ नेपालको दशौं राष्ट्रिय महाधिवेशनको पोखरामा उद्घाटन गर्दै ओलीले एक जनाको मात्र कुण्डली हेरेर नहुने भन्दै जनताको कुण्डली हेर्न सुझाव दिए।
‘एउटाको मात्र हेरेर हुन्छ, यहाँ थुप्रै मान्छे छन्,’ उनले भने, ‘जनताको कुण्डली हेर्नुस्। कुनै राजतन्त्र साजतन्त्र फर्कदैन। पैतियगमन यस देशमा हुँदैन।’
अढाइ सय वर्षदेखि राजतन्त्र देखेको भन्दै उनले दरबार हत्याकाण्डपछि ज्ञानेन्द्र भवितव्यले राजा भएको बताए। ज्ञानेन्द्रले ३ वर्ष सत्ता हातमा लिएर चिथोर्न थालेको उनले बताए। कानमा कन्सुत्लो पसेजस्तो अनुभव राजाको शासनकालमा भएको भन्दै उनले त्यस्तो अनुभव गर्न नहुने बताए।
‘दरबार हत्याकाण्डपछि हामीले लखेटेको पूर्व राजा भनिएका भवितव्यले राजा भएका ज्ञानेन्द्र शाहले गरेका काम पनि देखेका छौं,’ उनले भने, ‘३ वर्ष शासन हातमा पार्दा कानमा घुसेको कन्सुत्लो जस्तो उफ्रिएको उफ्रियै, चिथोरेको चिथोर्यै। कानमा कन्सुत्लो पस्दा कस्तो हुन्छ, सबले अनुभव गरेका छैनन् होला, गर्न पनि हुँदैन।’
राप्रपा अध्यक्ष राजेन्द्र लिङ्देनले दिएको अभिव्यक्तिमा पनि उनले जबाफ फर्काएका छन्। लिङ्देनले प्रधानमन्त्री ओलीलाई हेलिकप्टरबाट भाग्ने सुविधा दिन्छौ भनेर दिएको अभिव्यक्ति दिएका थिए। जबाफमा ओलीले त्यस्ता सपना नदेख्न सुझाव दिए।
‘अस्ति एउटा ठिटो, प्रधानमन्त्री भाग्ने तयारी भाग्न हेलिकप्टर दिन्छौं रे। के के सपना देख्न थाले यिनीहरु,’ उनले भने, ‘कसले बोलेको हो त्यति याद गरिनँ। एउटा उत्ताउलो मान्छे कसले बोलेछ।’
ओलीले प्रतिगमन रोक्न युवा संघलाई अगाडी आउन पनि सुझाव दिए। ‘यो प्रयास रोक्न अग्रभागमा देशको रक्षा गर्न, प्रतिगमन रोक्न, नेपालको भूमि जोगाउन, अधिकारको रक्षा गर्न युवा संघ अग्रभागमा आउनुपर्छ,’ उनले भने।
अहिलेको सरकार भ्रष्टाचारविरूद्ध शुन्य सहनशीलताका साथ काम गरेको भन्दै उनले भ्रष्टाचार उदाङ्गो हुन्छ भनेर केही व्यक्ति तर्सिएको पनि बताए।
‘सरकार भ्रष्टाचारकोविरूद्ध शुन्य सहनशिलताका साथ कसैको अनुहार नहेरी अघि बढेको छ। हामी हल्ला होइन काम गरिरहेका छौं,’ उनले भने, ‘तर्सिरहेका छन् तर्सनेहरू। यो सरकार ढल्न सकेन भने यो सरकार कायम रह्यो भने भ्रष्टाचारको कुरा उदाङ्गो हुन्छ भनेर आत्तिएका छन्।’
-1742801159.jpg)
