राष्ट्रिय स्वतन्त्र पार्टी (रास्वपा) ले ‘प्रतिशोधविरुद्ध न्यायका लागि वृहत अभियान’ भन्दै हस्ताक्षर अभियान सञ्चालन गर्ने भएको छ।
सभापति रवि लामिछानेमाथि राज्यले प्रतिशोध गरेको भन्दै रासवपाले सहकोषाध्यक्ष दीपक बोहोराको संयोजकत्वमा अभियान सुरू गर्न लागेको हो।
‘दलतन्त्रको दोहन, राज्य संयन्त्रको अखीकरण लगायतका बेथिति एवं प्रतिशोध विरुद्ध न्यायका लागि वृहत अभियानको अवधारणा पत्र अनुमोदन गर्दै अबका राजनीतिक मुद्दा देश-विदेशमा रहेका आम नेपालीहरु माझनै स्थापित गर्ने गरी अघि बढ्न रास्वपा केन्द्रीय समिति दृढ संकल्पित छ,' रास्वपा कार्यवाहक प्रवक्ता मनिष झाले सोमबार निकालेको विज्ञप्तिमा भनिएको छ, 'यस अभियानका संयोजक सहकोषाध्यक्ष दीपक बोहरालाई तोकिएको छ।'
अभियानअन्तर्गत वृहत हस्ताक्षर कार्यक्रम गरिने रास्वपा सहकोषाध्यक्ष दीपक बोहोराले सेतोपाटीलाई बताए। 'हाम्रो सभापतिलाई अन्याय भएको छ र राज्यले प्रतिशोध साधेको छ भनेर हामीले अभियान चलाउछौं। त्यसका लागि हस्ताक्षर अभियान हुन्छ,' उनले भने, 'हामीले धेरैभन्दा धेरै जनतालाई यो कुरा बुझाएर हस्ताक्षर गराउछौं।'
