राष्ट्रिय स्वतन्त्र पार्टीकी सांसद चन्दा कार्कीले गृहमन्त्री रमेश लेखकको राजीनामा माग गरेकी छन्।
बुधबार सिंहदरबारमा बसेको राज्य व्यवस्था तथा सुशासन समितिको बैठकमा सांसद कार्कीले गृहमन्त्री लेखकको भिजिट भिसामा संलग्नता रहेको देखिएकाले राजीनामा दिएर मार्ग प्रशस्त गर्न आग्रह गरेकी हुन्।
'गृहमन्त्रीज्युले पहिल्यै दिन राजीनामा दिएको भए उचाई अझ ठूलो हुन्थ्यो। देशमा यति ठूलो मानव तस्कारको काण्ड उठिसकेपछि, सदनमा प्रतिपक्ष सबै उठेर विरोध गरिरहेका छन् भने गृहमन्त्रीज्युले १५ दिन राजीनामा दिए पनि हुन्छ । त्यसपछि फेरि छानबिन भएर फर्किएर आउन सकिहालिन्छ,’ उनले भनिन्।
उनले रास्वपाले सिधै गृहमन्त्री दोषी छन् नभनेको पनि बताइन्।
'गृहमन्त्रीको दोष छ भनेका होइनौं। नैतिकताको कुरा हो। सुसंस्कृति राजनीतिक अभ्यास गरेको मान्छेबाट हामीले त्यो अपेक्षा गछौँ,' उनले भनिन्।
