नेकपा (माओवादी केन्द्र) का प्रमुख सचेतक हितराज पाण्डेले भिजिट भिसा प्रकरणबारे छानविन समिति बनाउनुपर्ने माग गरेका छन्।
बुधवारको राज्य व्यवस्था तथा सुशासन समितिको बैठकमा बोल्दै उनले भिजिट भिसा प्रकरणबारे छानबिन समिति बनाउनुपर्ने माग गरेका हुन्।
भिजिट भिसा प्रकरणमा गृहमन्त्री रमेश लेखक संलग्न रहेको आरोप लगाउँदै प्रमुख प्रतिपक्ष दलसहितका विपक्षी राजनीतिक दलहरुले विरोध जनाउँदै गृहमन्त्री लेखकको राजीनामा माग गर्दै संसद अवरोध गरिरहेका छन्।
'यही बेलामा गृहमन्त्रीज्युले अख्तियारमा पठाएको प्रहरी अधिकारी एक पटक पठाएको फेरि अर्को पटक फिर्ता गरिएको छ। यो खालको विषयवस्तु आएर एउटा ठूलो कन्फ्युजन भएको छ। हामीले छानविन समिति आवश्यक पर्छ है भनेका छौं। यो गम्भीर विषय वस्तु हो,' उनले भने।
सांसद पाण्डेले नागरिकहरु सुशासन खोजिरहेका बेला सरकारले झनै कुसंस्कारका काम गरिरहेको आरोप लगाए।
'समितिमा कुरा सुशासनको छ, जनता जम्मै सुशासन खोजी गरिरहेका छन् । त्यो बारेमा के हो भनाइ?,’ उनले भने। - न्युज एजेन्सी नेपाल
