मुलुकभरिका २९१ स्थानीय तहका उपप्रमुख तथा उपाध्यक्षहरू विराटनगरमा भेला हुने भएका छन्।
शुक्रबार र शनिबार हुने भेलामा स्थानीय सरकारका उपप्रमुख तथा उपाध्यक्षहरूले अहिलेसम्मका असल अभ्यासको अनुभव आदान–प्रदान गर्नेछन्।
त्यस्तै स्थानीय तहहरूले बनाएका कानुनको कार्यान्वयनका सवालबारे छलफल समेत हुने विराटनगर महानगरकी उपमेयर शिल्पा निराला कार्कीले जानकारी दिइन्।
विराटनगर महानगरपालिकाले यो भेला आयोजना गर्दैछ।
उपमेयर कार्कीले दिएको जानकारी अनुसार भेलामा कोशी प्रदेशका सवै पालिका, देशभरका ६ महानगरपालिका, ११ उपमहानगरपालिका, मधेश प्रदेशका ७२ पालिका, बाग्मती प्रदेशका ४१ पालिका र बाँकी दुईवटा प्रदेशबाट केही नगरपालिका समेत गरी जम्मा २ सय ९१ पालिकाबाट उपप्रमुख तथा उपाध्यक्षको सहभागिता हुनेछ।
सम्मेलनको उद्घाटन पूर्व राष्ट्रपति विद्यादेवी भण्डारीले गर्ने तय भएको छ।
सम्मेलनमा स्थानीय तहले बनाएका कानुनको प्रभावकारी कार्यान्वयनको समीक्षा गर्ने, न्यायिक समितिको क्षेत्राधिकार वृद्धि गर्न संघीय र प्रदेश सरकारसँग घोषणापत्रमार्फत पहलका लागि लविङ गरिने कार्कीले जानकारी दिएकी छन्।
सम्मेलनमा संवैधानिक व्यवस्था बमोजिम विकेन्द्रित न्याय प्रणालीमा देखिएका विवाद र न्यायिक समितिको संयोजक एवं पदाधिकारीमा चाहिने ज्ञान, सीप तथा कार्यदक्षताका विषयमा पनि छलफल हुनेछ।
