नेकपा माओवादी केन्द्रका सांसद शक्तिबहादुर बस्नेतले भौतिक पूर्वाधार तथा यातायात मन्त्रालयले राज्यकोषको दुरूपयोग हुने गरी बजेट विनियोजन गरिएको भन्दै चरम लापरबाही गरिएको आरोप लगाएका छन्।
प्रतिनिधिसभाको शुक्रबारको बैठकमा खर्च कटौतीको प्रस्ताव प्रस्तुत गर्दै र भौतिक पूर्वाधारको विनियोजनबारे बोल्दै बस्नेतले कार्यकर्ता पोस्ने गरी विनियोजन भएको उल्लेख गरे।
‘भौतिक पूर्वाधारमा जुन प्रकृतिबाट विनियोजन गरिएको छ यो गैरजिम्मेवार त छँदैछ, यो अन्यायपूर्ण छ। यो विभेदपूर्ण छ। यो स्वाभाविक त मान्नै सकिन्न। यो एक प्रकारले अनियमितता भन्न सकिन्छ,’ बस्नेतले भने, ‘उदाहरणका लागि वैकल्पिक सहायक राजमार्ग भनेर झापामा चार दर्जन राजमार्गमा विनियोजन भएको छ। टोल टोलको सडकलाई पनि राजमार्ग भनिएको छ। एउटै जिल्लामा चार दर्जन हुन्छन् त सहायक राजमार्ग?’
कर्णालीका जिल्लामा पुग्दा कुनै जिल्लामा एउटा सडकमा बजेट विनियोजन भएको बताउँदै बस्नेतले कतै एउटै पनि नभेटिएको बताए।
‘मन्त्रीजीको दलको स्थानीय कमिटीले गरेको सिफारिसका आधारमा त्यो बजेट विनियोजन भएको हुनुपर्दछ,’ उनले भने, ‘यदी जिल्लाले गरेको भए त अलि ठूलो योजना सिफारिश गर्थ्यो होला। यसलाई राज्यकोषको दुरूपयोग हो भन्दा अन्यथा हुँदैन।’
जाजरकोटको एउटा पनि सडक रातो किताबमा नपरेको तर सच्याइनेछ भन्ने कुरा आएको उल्लेख गर्दै बस्नेतले भने, ‘यो भन्दा गैरजिम्मेवारपूर्ण काम के हुन्छ? यो भन्दा लापरबाही के हुन्छ, यो विधि लापरबाही त नगरौं न।’
रणनीतिक सडक पुलमा पनि मनपरी गरिएको उनले बताए।
‘रारा राजमार्गका भए जतिका आधा दर्जन सडक पुल यसपटक डिलिट भएछन्,’ उनले भने, ‘मन्त्रालयको बजेट बढेको छ। तर, ठूला राजमार्गमा पनि बजेट घटेको छ। बजेट गयो कहाँ?’
उनले मन्त्रीहरूको अनुपस्थितिले सदनको कार्यसूचीबाट छलफल हटाउनु पर्ने अवस्थाले सरकार र मन्त्रीहरुको गैरजिम्मेवारी दर्शाएको भन्दै त्यसको पनि विरोध गरेका छन्।
