आफ्नै पार्टीकी नेताको पाँच लाख रुपैयाँ नतिरेको आरोपमा पर्सा प्रहरीबाट पक्राउ पुर्जी जारी भएपछि फरार रहेकी लुम्बिनी प्रदेशसभा सदस्य तथा पूर्वमन्त्री सुमन शर्मा रायमाझीले दुई वर्षदेखि घर भाडा समेत नबुझाएको पाइएको छ।
दाङको राप्ती गाउँपालिका वडा नं १ स्थित हेमलाल आचार्यको घरमा ०७९ माघ ४ गतेदेखि बसेकोमा हालसम्म एकपटक ८० हजार दिएर त्यसयता केही नदिएको भन्दै लुम्बिनी प्रदेश सभामा निवेदन परेको हो।
आचार्यले मासिक १० हजार दिने गरी भाडाको सहमति भएर आफ्नो घरको एक फ्ल्याट लिए पनि धेरै पटक अनुरोध गर्दा पनि भाडा नपाएकाले निवेदन सार्वजनिक गर्नुपरेको र यो विषय प्रदेश सभा र सरकारलाई समेत जानकारी गराएको बताए।
सांसदहरूले आफ्नो नियमित पारिश्रमिकबाहेक हरेक महिना १७ हजार रकम सरकारबाट घर भाडा पाउँदै आएका छन्।
घरबेटीले न्यायको अपिल गरेपछि प्रदेशसभा सदस्य रायमाझीको एकपछि अर्को गलत कार्य बाहिर आएको हो। जनमत पार्टीबाट समानुपातिक सांसद बनेकी रायमाझी बर्दिया निवासी हुन्।
रायमाझीले घरभाडाबापत प्रदेश सभाबाट नियमित रकम लिँदै आएकी छन् तर, उता रकम बुझेर घरबेटीलाई नबुझाएको आचार्यको निवेदनमा उल्लेख छ।
‘म अरू आम्दानीको स्रोत भएको मान्छे होइन, कानुन बनाउने र जनतालाई न्याय दिन जनप्रतिनिधिबाट यस्तो कल्पना गर्ने कुरा थिएन, मैले धेरै पटक फोन गर्दा पनि उठाउनुभएको छैन, धेरै पटक भोलि, भोलि भनेर टार्नुभएको छ, अहिले त धेरै समय भयो यहाँ घरमा आउनुभएको पनि छैन, मोबाइल पनि स्वीचअफ छ,’ आचार्यले भनेका छन्।
आचार्यले सभामुखलाई नै न्याय दिलाउन आग्रह गर्दै निवेदन दर्ता गराएका छन्।
यसअघि जसपाबाट समानुपातिक सांसद भएर मन्त्री बनेकी रायमाझी ०७९ को निर्वाचनअघि जनमत प्रवेश गरेर समानुपातिक सांसद बनेकी हुन्।
प्रदेश सभा सचिव दुर्लभकुमार पुनले घरबेटीले सभामुखलाई निवेदन दिएको भए पनि त्यो व्यक्तिगत विषय भएकाले प्रदेश सभाले रायमाझीले पाउने सेवा नियमित दिएको र काटेर दिन नमिल्ने बताए।
रायमाझी यसअघि बुटवलमा रहँदा पनि घर भाडा नबुझाएको विषय बाहिर आएको थियो।
