नेपाली कांग्रेसका महामन्त्री गगन थापाले फोहोर चलाएर आफू फोहोरी नबन्ने बताएका छन्।
बुधबार केन्द्रीय समिति बैठकमा थापाले पूर्वमन्त्री तथा केन्द्रीय सदस्य मोहन बस्नेतले आफूमाथि लगाएको आरोपलाई गम्भीर, अराजनीतिक, अशिष्ट र अमर्यादित आरोपलाई खण्डन गर्दै फोहोरी बन्न नचाहेको बताएका हुन्।
'फोहोर चलाएर म फोहोरी बन्न चाहन्नँ,' थापाले भने।
मोहन बस्नेतले केन्द्रीय बैठकमा गगन थापालाई लक्षित गर्दै आरोप लगाएपछि थापाले ती आरोपलाई 'राजनीतिको तह र सभ्यताको सीमा नाघ्ने' भन्दै जवाफ फर्काएका हुन्। टेरामक्स प्रकरणमा मुछिँएका बस्नेत धरौटीमा छुटेका थिए।
'बाले भन्नुहुन्थ्यो, कसैले आरोप लगाए दिइहाल्नुपर्छ जवाफ। आमाले भन्नुहुन्थ्यो, फोहोर नचलाउनु- फोहोर चलाए आफैं फोहोरी भइन्छ। आज म आमाको कुरा सुन्छु,' उनले भने।
थापाले सभापति शेरबहादुर देउवालाई प्रत्यक्ष सम्बोधन गर्दै, आफ्नो अनुपस्थितिमा केन्द्रीय समितिको बैठकमा धम्कीपूर्ण भाषा र अभद्र व्यवहार देखाउने प्रवृत्तिको आलोचना गरेका छन्।
उनले भने, 'म तरूण दलको अनशनरत साथीहरूको माग सम्बोधन गर्न वार्तामा थिएँ। तर बैठकभित्रै एक केन्द्रीय सदस्यले हुंकार मिश्रित धम्की दिनुभयो रे। त्यो नैतिक पतन हो।'
यसअघि सानेपामा बुधबार बसेको केन्द्रीय समिति बैठकमा बोल्दै बस्नेतले महामन्त्री थापालाई लक्ष्य गर्दै धेरै महत्त्वकांक्षा बोकेर हिँड्नेहरू होस् गर्नु भनेका हुन्।
महामन्त्री थापाले सदनमा टेरामक्स लगायतका भ्रष्टाचार विषयमा बोलेर अख्तियार पठाउने गरेको आरोप बस्नेतको छ।
अख्तियार दुरूपयोग अनुसन्धान आयोगले नेपाल दूरसञ्चार प्राधिकरणका लागि टेरामक्स प्रविधि खरिद गर्दा भ्रष्टाचार भएको भन्दै मोहनबहादुर बस्नेतसहित १६ जनाविरूद्ध जेठ १ गते मुद्दा दर्ता गरेको थियो।
विशेष अदालत काठमाडौंले असार १५ गते बस्नेतलाई २५ लाख धरौटीमा छाड्न आदेश दिएको थियो।
यही प्रसंग उठाउँदै केन्द्रीय सदस्य बस्नेतले महामन्त्री थापामाथि आक्रोश व्यक्त गरेका हुन्।
आफूविरूद्ध अख्तियारले भ्रष्टाचार मुद्दा दर्ता गर्नुमा महामन्त्री थापाको हात रहेको आरोपसमेत उनको थियो। प्रतिशोधको राजनीतिले कसैलाई पनि नछाड्ने उनले बताएका थिए।
‘महामन्त्री गगनजी मलाई मात्रै होइन, बालकृष्ण खाणलाई पनि समाउनुपर्छ भनेर अख्तियारमा लाग्नुभयो, मलाई मात्रै होइन सबै नेतालाई समाउनुहोस्, तपाईं चाहिँ कहाँ जानु हुन्छ नि! तपाईंको बारेमा हामीले भनिदिएको छैनौं। महामन्त्रीजीका बारेमा मसँग ठूलो फाइल छ, अहिले म धेरै भन्न चाहन्न,’ बस्नेतले केन्द्रीय समिति बैठकमा भने, ‘यहाँ कोही पनि चोखो छैन, प्रतिशोधको राजनीतिले कसैलाई पनि छाड्दैन।’
उनले आफू अन्यायमा परेको भन्दै केन्द्रीय समिति बैठकमा बोल्न नपाए बाहिर बोल्नुपर्छ भन्दै कुरा अघि बढाएका थिए।
‘हामीलाई पनि छ पीडा, यहाँ बोल्न नपाए बाहिर बोल्नुपर्छ,’ बस्नेतले भने, ‘म अन्याय सहन्न, अन्तिमसम्म लड्छु, प्रतिकार गर्छु। धेरै महत्त्वकांक्षा बोकेर दौडिनेहरू होस् गर्नुस्, ठाउँको ठाउँ पर्ला, कुठाउँ पर्ला।’
बस्नेतले केन्द्रीय समितिमा करिब १४ मिनेट कुरा राखेका थिए।
पार्टीले नेपाल राष्ट्र बैंकको गभर्नर लिएर आफूमाथि भ्रष्टाचार मुद्दा दर्ता गरिएकोसमेत दाबी उनले गरेका थिए। गभर्नरमा सभापति शेरबहादुर देउवाले नाम दिएका विश्व पौडेललाई सरकारले नियुक्त गरेको थियो।
‘गभर्नर लिनुस्, म चाहिँ मुद्दा लड्छु भनेको थिएँ,’ उनले भने।
कांग्रेस बैठकमा विभिन्न १३ एजेन्डामाथि छलफल भइरहेको छ। एजेन्डाभन्दा बाहिर गएर कुनै सदस्यले धारणा राखेमा सभापति शेरबहादुर देउवाले रोक्ने गर्छन्।
तर आज मोहन बस्नेतले महामन्त्री थापालाई लक्ष्य गर्दै 'ठाउँको ठाउँ पर्ला' जस्ता धम्कीपूर्ण अभिव्यक्ति दिँदा सभापति देउवाले नरोकेको एक केन्द्रीय सदस्यले जानकारी दिए।
-1746009348.jpg)
