ललितपुर महानगरले महानगरबासीको स्वास्थ्य बिमाको ४० प्रतिशत प्रिमियम तिर्ने भएको छ।
बुधबार ललितपुर महानगर र राष्ट्रिय बिमा बोर्डबीच प्रिमियम तिर्ने सम्बन्धी समझदारी पत्रमा महानगर प्रमुख चिरीबाबु महर्जन र बीमा बोर्डका कार्यकारी निर्देशक रघुराज काफ्लेले संयुक्त रूपमा हस्ताक्षर गरेका हुन्।
यसैगरी नगर प्रहरी, महानगरका सरसफाईकर्मी, सवारीचालक र महानगरमा बसोबास गर्ने एकल महिला र टोल स्वास्थ्य उत्प्रेरक (टिएचपी) को भने सय प्रतिशत नै प्रिमियम महानगरले नै तिर्नेछ।
ललितपुर महानगरले पाटन अस्पतालसँगको प्राविधिक सहयोगमा स्वास्थ्य बीमा कार्यक्रम दुई वर्ष अघि सुरू गरेको थियो।
यल स्वास्थ्य केन्द्रमार्फत् बिमा कार्यक्रमको प्रथम सेवा केन्द्रबाट प्राप्त हुने स्वास्थ्य सेवा लिइरहेका छन्।
ललितपुर महानगरका प्रमुख चिरीबाबु महर्जनले पाटन अस्पतालसँग सहकार्य गरेर महानगरको स्वास्थ्य क्षेत्रमा नयाँ र नौलो काम गरेको बताए।
'महानगरले महानगरबासीलाई प्रदान गर्ने स्वास्थ्य सेवाको प्रस्थान विन्दु हो,' उनले भने।
कोभिडको बेलादेखि पाटन अस्पतालसँग सहकार्य गर्दै आएको बताउँदै प्रमुख महर्जनले कोभिडपछि महानगरले सहयोगमा पाटन अस्पतालमा अक्सिजन प्लान्ट समेत जडान गरिएको बताए।
महानगरका प्रवक्ता राजु महर्जनले पनि महानगरबासीको स्वास्थ्यप्रति महानगर संवेदनशील भएको बताए।
'प्रिमियम तिर्ने महानगर पहिलो स्थानीय तह हो,' उनले दाबी गर्दै भने।
पाटन स्वास्थ्य विज्ञान प्रतिष्ठानका निर्देशक रवि शाक्यले स्वास्थ्य बीमा कार्यक्रममा समेटिएका नागरिकको ४० प्रतिशत प्रिमियम तिर्ने निर्णय महत्वपूर्ण निर्णय भएको बताए।
-1746009348.jpg)
