नेकपा (एमाले) का वरिष्ठ उपाध्यक्ष ईश्वर पोखरेलले पूर्वराष्ट्रपति विद्यादेवी भण्डारीको सदस्यता नवीकरण भइसकेको विषय महासचिवले नै भनिसकेको दाबी गरेका छन्।
महासचिव शंकर पोखरेलले एक अन्तर्वार्तामा पूर्वराष्ट्रपतिले सदस्यता नवीकरण गरिसकेको विषय राखेको वरिष्ठ उपाध्यक्ष पोखरेलको भनाइ छ।
‘उहाँको सदस्यता नवीकरणको विषय त महासचिवले एक अन्तर्वार्तामा भनिसक्नुभएको छ,’ वरिष्ठ उपाध्यक्ष पोखरेलले भने।
च्यासलमा प्रधानमन्त्रीसमेत रहेका अध्यक्ष ओली र पूर्वराष्ट्रपति भण्डारीबीच आइतबार अपराह्न छलफल भएको थियो।
सोही क्रममा च्यासल पुगेका वरिष्ठ उपाध्यक्ष पोखरेलले महासचिव पोखरेललाई लक्ष्य गर्दै पूर्वराष्ट्रपतिको सदस्यता नवीकरण भइसकेको बताएको उल्लेख गरेका हुन्।
एमाले संस्थापन पक्षले भने भण्डारीको सदस्यता पेन्डिङमा रहेको दाबी गर्दै आएको छ।
उपाध्यक्ष सुरेन्द्र पाण्डेले सदस्यताको विषयलाई विवादित बनाउन नहुनेमा जोड दिए। पूर्वराष्ट्रपति भण्डारीलाई च्यासलमा उनैले स्वागत गरेका थिए।
‘उहाँले दुई वर्षअघि नै पार्टी सदस्यता नवीकरण गरेँ भन्नुभएको छ,’ पूर्वराष्ट्रपतिप्रति लक्ष्य गर्दै उनले भने, ‘सचिवालय बैठकमा पनि महासचिवले पूर्वराष्ट्रपतिले सदस्यता नवीकरण गरेको विषय राख्नुभएको थियो।’
साथै पार्टी केन्द्रीय कार्यालय परिसरमै पत्रकारहरूसँग कुराकानी गर्दै सचिव योगेश भट्टराईले सदस्यताको कुरा प्राविधिक पक्ष मात्रै भएको बताए।
‘प्राविधिकभन्दा पनि यो विषय राजनीतिक हो, पहिले राजनीतिक कुरा टुंगिनुपर्छ,’ उनले भने, ‘पूर्वराष्ट्रपति राजनीतिमा आउने कुरा टुंगियो भने सदस्यता त लिन सकिन्छ।’
-1746009348.jpg)
