नेपाली कांग्रेसका महामन्त्री गगन थापाले पार्टीको आधारभूत मूल्यमान्यतासँग सम्झौता गर्नुपरेमा सरकार छाडेर हिँड्नुपर्ने बताएका छन्।
बिपी स्मृति दिवसमा कांग्रेस चितवनले गरेको कार्यक्रममा बोल्दै महामन्त्री थापाले भने, ‘हामी सरकारमा एमालेसँग छौं भन्दै गर्दा हाम्रा आधारभूत कुराहरूसँग, न्यूनतम मूल्यमान्यता जे छ त्यसँग सम्झौता गर्नुपर्ने अवस्था आयो भने एक मिनेट पनि नसोची तिम्रो सरकार तिमीलाई मुवारक, हामी आफ्नो बाटो हिँडौं भनेर भन्छु म, त्यो हिम्मत बोकेर बस्नुपर्छ।’
उनले कांग्रेसका मन्त्रीहरूले खल्तीमा राजीनामा बोकेर बस्नुपर्ने पनि बताए।
‘कांग्रेसका मन्त्रीहरूले खल्तीमा राजीनामा बोकेर बस्नुपर्छ, मैले गलत काम गर्नुपर्यो भने त्यही बेलामा पड्काइदिन्छु म प्रधानमन्त्रीको टेबुलमा भन्ने हिम्मत गर्नुपर्छ,’ महामन्त्री थापाले भने, ‘अनि कांग्रेसको सभापतिले पनि आधारभूत मूल्यमान्यतामा सम्झौता गर्नुपर्यो भने तिम्रो प्रधानमन्त्री, तिम्रो सरकार, तिमीलाई मुवारक हिँड्छु म भन्ने हिम्मत मनमा राखिराख्नुपर्छ। सिंगो कांग्रेस पार्टीले राख्नुपर्छ अनि त्यो आँटका आधारमा नचाहिने कुनै पनि कुरा हामीले मान्दैनौं।’
निजामती, भूमिलगायत विधेयकमा कांग्रेस-एमालेबीच मतभेद रहेको संकेत थापाको थियो।
महामन्त्री थापाले आगामी चुनावका हिसाबकिताब छाडिदिन पनि आग्रह गरेका छन्। ‘चुनावको चिन्ता भनेको लोभी हुनु हो, लोभी भए धेरै कुरा गर्न सकिन्न, डराइन्छ, के को डर, सत्यको पक्षमा उभिने हो,’ उनले भने, ‘त्यो हिम्मत कांग्रेसका प्रत्येक साथीले राख्नुपर्छ, हामीसँग योजना र सङ्कल्प छ। घरको फोहोर पनि सफा गरौं।’
-1746009348.jpg)
