नेपाली कांग्रेसले प्रतिनिधि सभा समानुपातिकतर्फ उम्मेदवार सूची बनाइरहेको छ।
केन्द्रीय कार्यालय सानेपामा बसेर नेताहरूले देशभरका प्रतिनिधि सभा क्षेत्र, जिल्ला र प्रदेश हुँदै सिफारिस आएका उम्मेदवारको नाम कलस्टरअनुसार मिलाउन छलफल र तयारी गरिरहेका छन्।
कांग्रेसले प्रदेश कार्यसमितिहरूलाई मापदण्ड बनाएर दिएको थियो। त्यसअनुसार उम्मेदवारको सूची बनाउन लागिएको नेताहरूले जनाएका छन्।
‘पहिले समानुपातिक सांसद भइरहेकालाई नदोहोर्याउने, युवा लगायतलाई पनि अघि बढाउने भन्नेजस्ता मादपण्ड छन्, त्यसअनुसार सूची बनाउने काम भइरहेको छ,’ सुदूरपश्चिम प्रदेश सभापति वीरबहादुर बलायरले सेतोपाटीसँग भने।
सभापति शेरबहादुर देउवा, कार्यवाहक सभापति पूर्णबहादुर खड्का, नेता शेखर कोइराला, केही केन्द्रीय सदस्यहरू र प्रदेश सभापति लगायतबीच परामर्शमै समानुपातिक सूची बनाउने काम अघि बढेको छ।
प्रदेश सभापतिहरूले आफ्ना प्रदेशमा रहेका केन्द्रीय सदस्यहरूसँगको परामर्शमा तलबाट सिफारिस भएर आएका नामहरूबीचबाटै समानुपातिक उम्मेदवार सूची तयार पार्दैछन्।
समानुपातिक उम्मेदवार तय गर्न कांग्रेसमा चरण चरणमा र गुटहरूबीच आन्तरिक रूपमा पनि गृहकार्य भइरहेको नेताहरूले जनाएका छन्।
सभापति देउवा पक्षले आमन्त्रित रूपमा भन्दै समानुपातिक सूची बनाउने बैठकमा केन्द्रीय सदस्यहरूलाई बोलाउने गरेको छ।
कोशीबाट ज्ञानेन्द्रबहादुर कार्की, मधेसबाट सहमहामन्त्री महेन्द्र यादव, बागमतीबाट प्रवक्ता प्रकाशशरण महत, गण्डकीबाट मुख्यमन्त्रीसमेत रहेका केन्द्रीय सदस्य सुरेन्द्रराज पाण्डे, लुम्बिनीबाट बालकृष्ण खाण, कर्णालीबाट जीवनबहादुर शाहीलगायत नेताहरूलाई पनि बैठकमा सभावेश गर्ने गरेको स्रोतको भनाइ छ।
समानुपातिक उम्मेदवार तयार पार्ने छलफलमा महामन्त्री गगन थापा र विश्वप्रकाश शर्मा कम उपस्थित छन्। चुनावअघि महाधिवेशन नभए आफू चुनाव नै नउठ्ने महामन्त्री थापाको भनाइ छ भने नयाँ पुस्तालाई ठाउँ छाड्न आफू चुनावमा नउठ्ने महामन्त्री शर्माको भनाइ छ। नेता शेखर कोइराला भने समन्वयकारी भूमिकामा रहेको नेताहरूले जनाएका छन्।
लुम्बिनी कांग्रेस सभापति अमरसिंह पुन मगरले समानुपातिक उम्मेदवार सूची बनाउँदा पार्टीले प्रदेश कार्यसमितिसँग पनि परामर्श गरेको जानकारी दिए। कांग्रेसमा टिकट बाँड्न सभापति शेरबहादुर देउवाको नेतृत्वमा संसदीय समिति छ। उक्त समितिमा प्रदेश सभापतिहरू पनि आमन्त्रित सदस्य रहन्छन्।
‘समानुपातिक उम्मेदवार सूची बनाउने विषयमा पार्टीले प्रदेश कार्यसमितिसँग पनि समन्वय गरेको छ, तर हामीले दिएका सुझाव कत्तिको कार्यान्वयन हुन्छ हेर्न भने बाँकी छ,’ उनले भने, ‘सूची बनाउने छलफलमा हामी पनि बस्ने काम भएको छ।’
उनकाअनुसार अवसर नपाएका, भूगोल समेट्ने र क्षमतावानलाई उम्मेदवार बनाउने मापदण्ड छ। त्यसअनुसार क्षेत्र, जिल्ला र भूगोल हेरी कलस्टरअनुसार सूची बनाउने काम भइरहेको छ।
कांग्रेसमा १४ जना पदाधिकारी छन्। अहिलेसम्म कोही पनि पदाधिकारीमा बस्ने जस्तो नदेखिएको एक नेताले जानकारी दिए।
‘कोषाध्यक्ष चितवनबाट समानुपातिकमा सिफारिस हुनुभएको रहेछ, तर अहिलेसम्म पदाधिकारीबाट को को समानुपातिकमा बस्ने यकिन छैन,’ ती नेताले भने, ‘महामन्त्री विश्वप्रकाश शर्मा चुनाव नलड्ने भन्नुभएको छ, उहाँ समानुपातिकमा बस्नु हुन्न।’
पार्टीले समानुपातिक उम्मेदवार सूची बनाइराख्दा विशेष महाधिवेशन पक्षधरले विशेष महाधिवेशन माग गरिरहेका छन्। साथै पार्टीभित्र समानुपातिक उम्मेदवार सूची बनाउँदा पनि ५४ प्रतिशत महाधिवेशन प्रतिनिधिहरूलाई ख्याल गर्न उनीहरूले चेतावनी दिएका छन्।
‘सभापति देउवा, कार्यवाहक सभापति र उहाँहरू निकट हौं भन्नेहरूले विशेष महाधिवेशन पक्षधरको माग पुसभित्रै महाधिवेशनलाई अटेर गर्ने हो र पेलेर जाने हो भने हामी प्रतिवाद गर्छौं, त्यसो हुँदा समानुपातिकतर्फ पनि उम्मेदवारी नदिन सक्छौं,’ विशेष महाधिवेशन पक्षधर एक नेताले भने।
कांग्रेसले मंसिरभित्रै पार्टीका तल्ला तहबाट प्रतिनिधि सभा प्रत्यक्ष, समानुपातिक र राष्ट्रिय सभा निर्वाचनका लागि उम्मेदवार सिफारिस मगाएको थियो।
उम्मेदवार छिट्टै मगाए पनि कांग्रेसले समानुपातिक सूची भने ढिला गरी तयार पार्दैछ। क्षेत्र, जिल्लाबाट समानुपातिकतर्फ पनि युवाहरूको नाम सिफारिस भएर आएको थियो।
सूची बनाउँदा कांग्रेसले युवाहरूलाई स्थान दिन्छ कि दिँदैन यकिन भइसकेको छैन।
निर्वाचन आयोगले समानुपातिक उम्मेदवार सूची बुझाउन आज र भोलिका लागि समय दिएको छ।
-1756794700.JPG)
-1746009348.jpg)
