नियमित महाधिवेशन नभएपछि नेपाली कांग्रेसमा विशेष महाधिवेशन तयारी सुरू भएको छ।
सभापति शेरबहादुर देउवा र कार्यवाहक सभापति पूर्णबहादुर खड्काको सहमतिबिनै विशेष महाधिवेशन प्रक्रिया अघि बढ्न लागेको हो।
महामन्त्रीद्वय गगन थापा र विश्वप्रकाश शर्माले विधानको धारा १७ को २ कार्यान्वयन गर्न विशेष महाधिवेशन आयोजना गर्न लागेका छन्।
त्यसको तयारीस्वरूप काठमाडौंको भृकुटीमण्डपमा हल बुकिङसमेत भएको छ।
केन्द्रीय सदस्य प्रतिमा गौतमले नियमित महाधिवेशन नभएकोले विशेष महाधिवेशन बाध्यकारी भएको, पुस २७ र २८ गतेका लागि भृकुटीमण्डपमा हल बुकिङ गरिसकिएको सेतोपाटीलाई जानकारी दिइन्।
‘पुस २६ गतेदेखि १५ औं महाधिवेशन गर्ने गरी केन्द्रीय समितिले कार्यतालिका ल्याएको थियो। त्यसअनुसार हिजो वडा र आज पालिका अधिवेशन हुनुपर्ने कार्यतालिका हो, हुन सकेन,’ उनले भनिन्, ‘विधानको धारा १७ को २ अनुसार अब विशेष महाधिवेशन हुन्छ, त्यसका लागि दुई दिन हल बुकिङ गरिएको हो।’
महामन्त्री थापा र शर्मामाथि विशेष महाधिवेशन पक्षधरहरूले विशेष महाधिवेशन आयोजना गर्न दबाब दिइरहेका छन्। महामन्त्री थापा र शर्मा पनि नियमित महाधिवेशन नभएकोले अब विशेष महाधिवेशन बाध्यकारी भएको निचोडमा पुगेका छन्।
‘दुई महामन्त्रीको हस्ताक्षरमा विशेष महाधिवेशन आह्वान हुन्छ, सभापति शेरबहादुर देउवालाई विशेष महाधिवेशन अध्यक्षता गर्न आउन पत्र दुवै महामन्त्रीको हस्ताक्षरसहित पत्र पठाइन्छ,’ स्रोतले सेतोपाटीसँग भन्यो, ‘विधानअनुसार केन्द्रीय कार्यालय महामन्त्री मातहत रहन्छ, केन्द्रीय कार्यालयले विशेष महाधिवेशन आयोजना गर्न सक्छ, पदाधिकारीले पनि विशेष महाधिवेशन आयोजना गर्न मिल्छ भनेर कानुन व्यवसायीहरूको सुझाव छ।’
हालै विशेष महाधिवेशन पक्षधरले पार्टी केन्द्रीय कार्यालय पुगेर कार्यवाहक सभापति पूर्णबहादुर खड्कालाई पुस २८ गतेभित्रै विशेष महाधिवेशन गर्न मिति र स्थान तोक्न माग गरेका थिए। तर सभापति तथा कार्यवाहक सभापति यसतर्फ अघि बढेनन्। बरू सभापति देउवाले केही पत्रकारहरूलाई निवासमा बोलाएर विशेष महाधिवेशन हुँदैन भनेका थिए।
‘कार्यवाहक सभापतिलाई स्मरण पत्र बुझाएर विशेष महाधिवेशन मिति र स्थान तोक्न भनिएको थियो, उहाँले अटेरी गर्नुभयो, विधान कार्यान्वयन गर्नेतिर ध्यान दिनुभएन, त्यसैले अब सिधै सभापति देउवालाई नै विशेष महाधिवेशन अध्यक्षता गर्न आउन पत्र पठाउन लागिएको हो,’ स्रोतले भन्यो।
सभापति देउवा पार्टी बैठकमा नआउने तर शक्तिको अभ्यास गरिरहेको भन्दै महामन्त्री थापाले पार्टी कार्यालय सानेपाबाटै आलोचना गरेका थिए।
कांग्रेसको १४ औं महाधिवेशनमा रहेका ४७४३ महाधिवेशन प्रतिनिधिमध्ये ५४ प्रतिशतले विशेष महाधिवेशन माग गर्दै असोज २९ गते कार्यवाहक सभापति खड्कालाई हस्ताक्षर बुझाएका थिए।
उक्त हस्ताक्षर सनाखतलगायत केही पनि अघि बढ्न सकेको थिएन। त्यसबीचमा डेढ महिना केन्द्रीय समिति बैठक बसेर मंसिर १५ गते सभापति र कार्यवाहक सभापतिले पुस २६ देखि २८ गतेसम्म १५ औं महाधिवेशन गर्ने गरी कार्यतालिका पारित गरे पनि त्यसअनुसार काम अघि बढेको थिएन।
विशेष महाधिवेशन माग गर्दै हस्ताक्षर गरेकाहरूलाई पनि काठमाडौं आउन आग्रह गरिएको नेताहरूले जनाएका छन्।
सभापति देउवा पक्षका नेताहरू भने विशेष महाधिवेशन पक्षमा छैनन्। विशेष महाधिवेशन भएका खण्डमा उनीहरूले भाग लिन्छन् कि लिँदैनन् यकिन भइसकेको छैन।
प्रवक्ता प्रकाशशरण महतले भने चुनावको मुखमा विशेष महाधिवेशन नहुने बताएका छन्।
‘हल बुकिङ गरे पनि जे गरे पनि चुनावका मुखमा विशेष महाधिवेशन गर्न हुँदैन, केका लागि अहिले विशेष महाधिवेशन गर्ने?,’ उनले प्रश्न गरे, ‘अहिले एक भएर आम निर्वाचनमा जानुपर्ने बेला छ। नियमित महाधिवेशन गर्नुपर्ने जिम्मेवार साथीहरू नै विशेष महाधिवेशन भन्दै हुनुहुन्छ, अहिले किन चाहियो विशेष महाधिवेशन?’
उनले धारा १७ को २ अनुसार हस्ताक्षर बुझाएको ३ महिनाभित्र महाधिवेशन आयोजना गर्नुपर्ने भए पनि यसबीचमा १५ औं महाधिवेशन कार्यतालिका आएकोले त्यसको औचित्य सकिएको दाबी गरे। ‘आफ्नो जिम्मेवारीअनुसार काम नगर्ने अनि विशेष महाधिवेशन भनेर हुन्छ र?,’ उनको भनाइ छ।
-1746009348.jpg)
