नेपाली कांग्रेसको केन्द्रीय कार्यसम्पादन समितिले पास गरेको नियमित महाधिवेशनको कार्यतालिकामा दुई महामन्त्रीसहित पाँच जनाले 'नोट अफ डिसेन्ट' लेखेका छन्।
नोट अफ डिसेन्ट लेख्नेमा महामन्त्रीद्वय गगन थापा र विश्वप्रकाश शर्मा छन्।
त्यस्तै, सहमहामन्त्री फरमुल्ला मन्सुर र केन्द्रीय सदस्य अर्जुननरसिंह केसी र उमा रेग्मीले पनि नोट अफ डिसेन्ट लेखेका छन्।
कांग्रेस महामन्त्री थापाले विधान अनुसार अब पुस मसान्तभित्र विशेष महाधिवेशन हुने बताए। त्यो विशेष महाधिवेशन केन्द्रीय कार्यसमितिले निर्णय गरेर हुन्छ कि केन्द्रले आह्वान गरेर हुन्छ, त्यो चाहिँ केही दिनमा टुंगो लाग्ने उनले उल्लेख गरे।
शुक्रबारको केन्द्रीय कार्यसम्पादन समिति बैठकले पुसभित्र आवधिक महाधिवेशन नगरी नयाँ कार्यतालिका पारित गरेकाले अब विधान अनुसार विशेष महाधिवेशन हुने महामन्त्री थापाले बताएका हुन्।
'अब पुस मसान्तभित्र काठमाडौंमा विशेष महाधिवेशन हुनेछ, देशभरका साथीहरूसँग अब काठमाडौंमा भेटौंला,' उनले केन्द्रीय कार्यसम्पादन समितिको बैठकपछि सञ्चारकर्मीहरूसँग कुरा गर्दै भने।
उनले विधान अनुसार आफू जुनसुकै हदसम्म जान तयार रहेको बताएका छन्।
'कांग्रेस विधानको दफा १७ (२) ले ४० प्रतिशत महाधिवेशन प्रतिनिधिहरूले हस्ताक्षर गरेर विशेष महाधिवेशन माग गर्ने आयोजना गर्नुपर्ने व्यवस्था गरेको छ,' उनले भने।
त्यही आधारमा ५४ प्रतिशतभन्दा बढी महाधिवेशन प्रतिनिधिहरूले कि आवधिक महाधिवेशन कि विशेष महाधिवेशन भन्दै आएका थिए, गगनले भने, 'आजको बैठकबाट आवधिक महाधिवेशन नहुने निश्चित भयो। त्यसैले अब विधान अनुसार पुस मसान्तभित्र विशेष महाधिवेशन बाध्यकारी छ।'
पुसभित्र नियमित महाधिवेशन हुन नसकेको अवस्थामा विशेष महाधिवेशन बोलाउन बाध्यकारी भएकाले शुक्रबारको केन्द्रीय कार्यसमिति बैठकमा आफूले फरक मत राखेको उनले उल्लेख गरे।
कांग्रेस केन्द्रीय कार्यसम्पादन समितिको बैठकले २०८३ वैशाख २८, २९, ३० र ३१ गते नियमित महाधिवेशन गर्ने गरी नयाँ कार्यतालिका प्रस्ताव पारित गरेको हो। कांग्रेस प्रवक्ता प्रकाशशरण महतले कार्यसम्पादन समिति बैठकबाट संशोधित कार्यतालिका पास भएको जानकारी दिए।
बैठकपछि सञ्चारकर्मीहरूसँग कुरा गर्दै प्रवक्ता महतले भने, 'पुसमा प्रस्तावित महाधिवेशन त्यही मितिमा गर्न सम्भव नभएपछि संशोधित कार्यतालिका पास गरेको छ, जसअनुसार वैशाख २८, २९, ३० र ३१ गते नियमित महाधिवेशन हुनेछ।'
यो कार्यतालिका अनुसार चैत २१ गतेदेखि नै अधिवेशन प्रारम्भ हुने उनले बताए। बैठकमा कार्यवाहक सभापति पूर्णबहादुर खड्काले वैशाख मसान्तमा १५ औं महाधिवेशन गर्ने गरी प्रस्ताव प्रस्तुत गरेका थिए।
कार्यतालिकाअनुसार आगामी चैत २१ गते गाउँ नगर अधिवेशन तय गरिएको छ। त्यस्तै, चैत २५ गते गाउँ नगरपालिका अधिवेशन हुनेछ।
चैत २८ गते प्रदेश सभा क्षेत्रीय अधिवेशन तय गरिएको छ भने वैशाख २ गते एक मात्र प्रतिनिधि सभा निर्वाचन क्षेत्र र वैशाख ५ गते दुई वा त्यसभन्दा बढी प्रतिनिधि सभा निर्वाचन क्षेत्र भएको जिल्लाको अधिवेशन हुनेछ।
आगामी वैशाख १० देखि १२ गतेसम्म प्रदेश अधिवेशन गर्ने र वैशाख मसान्तभित्र केन्द्रीय अधिवेशन गर्ने कार्यतालिकामा उल्लेख छ।
-1746009348.jpg)
