नेपाली कांग्रेसका केही नेताहरूले आज सभापति शेरबहादुर देउवाको निवासमा छलफल गरे।
१५ औं महाधिवेशन वैशाख मसान्तमा गर्ने गरी केन्द्रीय कार्यसम्पादन समितिले बहुमतले निर्णय गरेको अवस्था र ५४ प्रतिशत महाधिवेशन प्रतिनिधिहरूले माग गरेअनुसार विशेष महाधिवेशनका सन्दर्भ, राष्ट्रिय सभा चुनाव र गठबन्धनलगायत विषयमा सभापति देउवा पक्षका नेताहरूबीच छलफल भयो।
साथै पार्टीभित्र नियमित कि विशेष महाधिवेशन भनेर भइरहेका विवादका सन्दर्भमा पनि केही कुराकानी भए। उक्त छलफल पछि कांग्रेसले केन्द्रीय कार्यसम्पादन समिति बैठक पनि आह्वान गरेको छ।
सभापति देउवा निवासमा भएको छलफलमा सहभागी सहमहामन्त्री महेन्द्र यादवसँग सेतोपाटीले गरेको कुराकानीको सम्पादित अंश;
आज सभापति निवासमा छलफल भएको रहेछ, के विषयमा हो?
अस्ती हाम्रो केन्द्रीय कार्यसम्पादन समितिले १५ औं महाधिवेशन वैशाख मसान्तमा गर्ने भनेर कार्यतालिका पारित गरेको थियो, तीलगायत विभिन्न विषयमा कुराकानी गरेका हौं। हामीले केन्द्रीय कार्यसम्पादन समितिबाट वैशाखमा महाधिवेशन गर्ने गरी कार्यतालिका ल्यायौं र पारित पनि भयो भनेर सभापतिज्यूलाई जानकारी गरायौं। सभापतिज्यूले भन्नुभयो- एकदम राम्रो निर्णय भयो, त्यसैअनुसार जानुस् भन्नुभयो।
विशेष महाधिवेशनबारे पनि सभापतिले केही कुरा राख्नुभयो कि!
केन्द्रीय कार्यसम्पादन समितिले गरेको निर्णय नै मेरो निर्णय हो भनेर उहाँले भन्नुभयो। तपाईंहरूले जे गर्नुभएको छ, राम्रो गर्नुभएको छ भन्नुभयो।
विशेष महाधिवेशनका सन्दर्भमा चाहिँ कुरै उठेन?
केन्द्रीय कार्यसमितिले नै वैशाखमा नियमित महाधिवेशन गर्ने भनेर निर्णय गरिसकेपछि सभापतिजी केन्द्रीय समितिको निर्णयभन्दा बाहिर जाने कुरा त आउँदैन नि! केन्द्रीय समितिले निर्णय नगरेसम्म एउटा पोजिसन थियो, निर्णय गरेपछि आम कांग्रेस कार्यकर्ताको त्यो निर्णय त सम्पत्ति भयो।
त्यसअनुसार केन्द्रीय समितिको निर्णय कार्यान्वयन गर्ने जिम्मेवारी महामन्त्रीहरूको पनि हो। विशेष महाधिवेशन औचित्य छैन भनेर हामीले भन्यौं। नियमित महाधिवेशन कार्यतालिका ल्याएपछि त्यो कार्यतालिका कार्यान्वयन गर्ने र विशेष महाधिवेशन औचित्य छैन भनेर बुझाउने महामन्त्रीहरूको पनि दायित्व हो नि!
विशेष महाधिवेशन विधानअनुसार बाध्यकारी छ भनेर कतिपय नेताहरूले भनिरहेका छन्, यो कसरी सम्बोधन हुन्छ?
केन्द्रीय कार्यसम्पादन समितिले नियमित महाधिवेशन कार्यतालिका ल्याएपछि अब टुंगिसक्यो नि! टुंगिएन र? केन्द्रीय कार्यसमितिभन्दा ठूलो केही छ र? अब कसैले भेला बोलाउँछ भने त्यो गुटको भेला होला।
अहिले नेतृत्व चयन नगर्ने, नीति महाधिवेशन गरौं भन्ने पनि कतिपय नेताहरूको कुरा रहेछ, केही तयारी छ?
नीति महाधिवेशनका रूपमा लिएर जान त केन्द्रीय समितिकै निर्णय हुनुपर्छ। केन्द्रीय कार्यसम्पादन समितिले विशेष महाधिवेशनको औचित्य छैन भनिसकेको छ। अहिले चुनावको मुखमा विशेष महाधिवेशन औचित्य छैन। सबै कार्यकर्ता चुनावमा लाग्नुपर्यो, चुनावको वातावरण वडादेखि केन्द्रसम्म बनाउन हामी लागेका छौं। विशेष महाधिवेशनको औचित्य छैन भनिसकेपछि व्यक्तिगत कुरा केही भएन, यो संस्थागत निर्णय हो।
केन्द्रीय कार्यसम्पादनले ल्याएको कार्यतालिका नमान्ने र विशेष गर्नेतिर अघि बढ्यो भने कारबाही गर्ने हो?
हैन हैन, अहिले म त्यो भन्दिनँ। केन्द्रीय समितिको निर्णयको विरोधमा कोही जान्छ भन्ने मलाई विश्वास छैन।
भोलि पनि कार्यसम्पादन समिति बैठक बस्दैछ, केही एजेन्डा तय भए त?
छैन छैन अहिलेसम्म तय भएको छैन।
आजको छलफलमा केही एजेन्डाबारे कुरा भएन?
त्यही राष्ट्रिय सभाको निर्वाचन हुन सक्छ।
दलहरूसँग चुनावी गठबन्धन गर्ने चर्चा पनि चलेको रहेछ कांग्रेसमा, केही कुरा भयो आज?
सबै पार्टीहरूले कांग्रेससँग गठबन्धन गरौं भनेका छन्। अब छलफल हुँदैछ।
राष्ट्रिय सभाका लागि कि फागुन २१ को प्रतिनिधि सभा चुनावका लागि पनि गठबन्धन गर्ने?
राष्ट्रिय सभा चुनावका लागि हो। दुवै चुनावका लागि होइन।
यो पनि: अबको पहिलो 'स्टेप' नै विशेष महाधिवेशन हो– प्रदीप पौडेल
-1746009348.jpg)
