नेपाली कांग्रेसको निर्णय र आधिकारिक धारणा प्रवक्ता प्रकाशशरण महतबाट आउँछ।
तर पछिल्ला दुई केन्द्रीय कार्यसम्पादन समिति बैठकका निर्णय प्रवक्ता महतले सुनाएनन्। त्यति मात्र होइन- विशेष महाधिवेशनलाई लिएर विवाद भइरहँदा उनी पछिल्ला दिनमा 'मौन' जस्तै छन् भन्ने चर्चा छ कांग्रेसभित्र।
किन यस्तो अवस्था आयो? किन उनले पार्टीका निर्णय सुनाउन पनि छाडे? सेतोपाटीले हिजो केन्द्रीय कार्यालयमा उनीनिकट केही मानिसहरूसँग कुराकानी गरेको छ।
‘अहिले प्रकाश दाइलाई हामीले मिडियामा खासै नबोल्न सुझाव दिएका छौं, उहाँ पार्टी प्रवक्ता हो, पार्टीका निर्णय सुनाउँदा पनि उहाँमाथि पार्टीकै कतिपय नेताहरू र सामाजिक सञ्जालमा पनि आलोचना हुन थाल्यो,’ महतनिकट ती नेताले भने, ‘केही दिन पार्टीका विवादहरूमा प्रतिक्रिया नदिन सुझाव दिएका छौं, नियमित वा विशेष महाधिवेशन जो जता पक्षधर भए पनि सबै कांग्रेसी नै हुन्।’
साथै महत नुवाकोट क्षेत्र नम्बर १ मा प्रतिनिधि सभा सदस्यका लागि फागुन २१ मा चुनाव लड्दैछन्। पार्टीका बैठक नभएका दिन महत नुवाकोट पुगेका हुन्छन्।
‘सधैं नियुक्ति खायो, समानुपातिकमा बस्यो भन्ने आरोप उहाँमाथि लगाइयो, नियुक्ति र मनोनीत त अरू पनि भएका छन्, उहाँको निष्पक्ष ढंगले मूल्याङ्कन पनि भएन,’ महतनिकट ती नेता भन्छन्, ‘यसपालि नुवाकोट १ बाट चुनाव जितेर देखाउनुपर्नेछ। त्यसैले उहाँले धेरै समय नुवाकोटमै दिइरहनुभएको छ।’
नुवाकोट कांग्रेसमा गुटउपगुट छ- अर्जुननरसिंह केसी र रामशरण महत हुँदै हुर्किएको गुट प्रकाशशरण महतसम्म पनि पुगेको छ। नेताहरूका अनुसार तलैसम्म कार्यकर्ता गुट र उपगुटमा विभाजित छन्।
‘केसी र महत पक्षबीच सुलह गर्न पनि खोजियो, धेरै मिलिसकेको छ, तर जरैसम्म गुटउपगुट भएपछि निकै गाह्रो हुने रहेछ,’ ती नेताले भने।
यसपालि अर्जुननरसिंह केसी नुवाकोट क्षेत्र नम्बर २ बाट समानुपातिकतर्फ सिफारिस भएका थिए। सोहीअनुसार उनी समानुपातिकमै बसे। उनका भाइ जगदीश्वरनरसिंह केसी क्षेत्र नम्बर २ मा प्रत्यक्षतर्फ चुनाव लड्ने तयारीमा छन्। उनी महामन्त्री गगन थापानिकट छन्।
नुवाकोटमा चुनाव लड्न र गुटउपगुट मिलाउन प्रकाशशरण महत पछिल्लो समय 'बोल्न छाडेको' चर्चा कांग्रेसभित्र छ।
कांग्रेसमा सभापति शेरबहादुर देउवा र कार्यवाहक सभापति पूर्णबहादुर खड्कासहित अधिकांश संस्थापन पक्षको विरोधबीच महामन्त्रीद्वय गगन थापा र विश्वप्रकाश शर्माले पुस २७ र २८ गतेका लागि विशेष महाधिवेशन आह्वान गरेका छन्।
पार्टी केन्द्रीय कार्यसम्पादन समितिको हिजोको बैठकले विशेष महाधिवेशन औचित्य नरहेको भन्दै हस्ताक्षर गरेका महाधिवेशन प्रतिनिधिहरूलाई हस्ताक्षर फिर्ता लिन आग्रह गरेको छ। तर महामन्त्री गगन थापाले विधानको कुन धाराअनुसार महाधिवेशन प्रतिनिधिले हस्ताक्षर फिर्ता लिने भनेर बैठकमै प्रश्न गरेका थिए। उनले विशेष महाधिवेशन फिर्ता नहुने पनि बताए।
पार्टीले विशेष महाधिवेशन पक्षधरलाई हस्ताक्षर फिर्ता गर्न गरेको निर्णय प्रवक्ता प्रकाशशरण महतले सुनाएनन्। ‘कार्यवाहक सभापतिज्यूले बोल्ने कुरा छ,’ भन्दै उनी केन्द्रीय कार्यालयबाट निस्किएका थिए।
महतनिकट केही सहयोगीहरूका अनुसार पार्टीका निर्णय सुनाउँदा पनि महतमाथि सामाजिक सञ्जालमा आलोचना बढ्न थालेको छ। ‘त्यसैले केही दिन प्रतिक्रिया नदिने कि भनेर हामीले सुझाएका छौं,’ उनीहरूको भनाइ छ।
पार्टीका निर्णय सुनाउँदा पनि सामाजिक सञ्जालमा आलोचना हुने हुँदा त्यसले पछि नुवाकोटमा चुनाव लड्न पनि असजिलो पार्छ कि भन्ने `भय´ महत निकटलाई छ।
महतनिकट नेता र सहयोगीहरूसँग कुराकानी गरेपछि प्रवक्ता महतलाई हामीले सोध्यौं, पछिल्ला बैठकको निर्णय तपाईंले किन सुनाउनु भएन?
पार्टीका आधिकारिक निर्णय बाहिर (प्रेस) मा सुनाउँदिनँ भनेर आफूले पार्टीमा नभनेको प्रवक्ता महतले बताए।
पार्टीको क्रियाशील सदस्यता नटुंगिएकै कारण नियमित महाधिवेशन वैशाखमा सार्नुपरेको विषय महतले केही दिनअघि सुनाएका थिए।
यसमा महामन्त्री गगन थापाले 'केन्द्रीय कार्यसम्पादनमा नबोल्ने तर तल आएर बकबक गर्ने, पाँचचोटि पढाइसकेँ यो विषयमा' भनेका थिए। यसमा प्रवक्ता महतलाई चित्त दुखेको छ।
‘मैले पार्टीका आधिकारिक निर्णय बाहिर (प्रेस) मा भनेको हुँ, मैले के बकबक गरेँ भनेर मैले केन्द्रीय कार्यसम्पादन समिति बैठकमै भनेको हुँ, महामन्त्रीजीले सुन्नुभयो केही जबाफ दिनुभएन,’ प्रवक्ता महतले सेतोपाटीसँग भने, ‘मैले कसैलाई व्यक्तिगत आक्षेप पनि लगाएको छैन। क्रम संख्या नभएका फारम पठाउँदा पनि महामन्त्रीलाई मैले दोष लगाएको होइन, केही समय लाग्छ भनेको थिएँ। तर महामन्त्रीजीलाई कसले प्रश्न सोध्यो र उहाँले बकबक नगर्नुस् भनेर भन्नुभएछ। मैले त पार्टीकै निर्णय त सुनाएको हो भनेर मैले बैठकमै गम्भीर आपत्ति जनाएको थिएँ।’
आफूले प्रवक्ताको भूमिकाअनुसार कसैमाथि लाञ्छना नलगाई आधिकारिक दृष्टिकोण मात्रै सार्वजनिक गर्ने गरेको महतले बताए।
‘यस्ता खाले लाञ्छना लगाउने काम नगर्नुस् भनेर मैले बैठकमै भनेको थिएँ, महामन्त्रीजीले केही बोल्नुभएन,’ उनले भने, ‘बाहिर (प्रेस) सँग बोल्दिनँ भनेर मैले बैठकमा भनेको होइन।’
पछिल्ला दुई केन्द्रीय कार्यसम्पादन समिति बैठकका निर्णय प्रवक्ता महतले सुनाएनन्। कतै जानु भएर समय अभाव भएर उनले नबोलेका होइनन्, उनका केही असन्तुष्टि थिए।
प्रवक्ता महतले निर्णय नसुनाएपछि एक दिन प्रचार विभाग प्रमुख मीनबहादुर विश्वकर्मा र अर्को दिन केन्द्रीय कार्यसम्पादन समिति सदस्य एनपी साउदले निर्णय सुनाएका थिए।
हामीले प्रवक्ता महतलाई किन निर्णय सुनाउनुभएन भनेर पनि सोध्यौं।
‘राष्ट्रिय सभा उम्मेदवार छनौटमा कतिपय कुरामा मलाई अलि चित्त बुझिरहेको थिएन, त्यसैले उम्मेदवारहरूको नाम पार्टीले नै सार्वजनिक गरे भइहाल्छ भनेको थिएँ, त्यस दिन मैले निर्णय सुनाइनँ,’ उनले भने, ‘हिजोको बैठकका निर्णय भने कार्यवाहक सभापतिजीले सुनाउने भन्ने थियो, उहाँले बोल्छु भन्नुभएको थियो, त्यसैले कार्यवाहक सभापति बोल्नुहुन्छ भनेर म निस्केको हुँ।’
प्रवक्ता महत निस्केको लामो समयसम्म पनि पार्टीका निर्णय सुनाउन कोही आएको थिएन। पछि केही पत्रकारहरूले कार्यवाहक सभापति बोल्ने हो कि होइन भनेर जिज्ञासा राखेपछि कार्यवाहक सभापतिले 'म भोलि बोल्छु' भन्दै नेता एनपी साउदलाई निर्णय सुनाउन पठाएका थिए, साउदले पार्टीका निर्णयहरू सुनाएका थिए।
कार्यवाहक सभापति खड्काले पार्टीका केन्द्रीय नेताहरूको उपस्थितिमा आज दिउँसो १ बजे पत्रकार सम्मेलन गर्ने भने पनि मुख्यसचिव कृष्णप्रसाद पौडेलले मध्याह्न पौने १२ बजे विज्ञप्ति निकालेर पत्रकार सम्मेलन स्थगित गरेका छन्।
-1746009348.jpg)
