तीन वटा निर्वाचन क्षेत्र रहेको कास्कीमा विभिन्न राजनीतिक दल र स्वतन्त्र गरी ४५ जनाले उम्मेदवारी दर्ता गरेका छन्।
जिल्ला निर्वाचन कार्यालय कास्कीका अनुसार यसरी उम्मेदवारी दिनेहरूमा ६ जना स्वतन्त्र उम्मेदवार छन् भने बाँकी ४९ जनाले विभिन्न राजनीतिक दलबाट उम्मेदवारी दर्ता गराएका हुन्।
फागुन २१ गते हुन गइरहेको प्रतिनिधि सभा निर्वाचनमा कास्कीका तीन वटै निर्वाचन क्षेत्रमा उठेका अधिकांश उम्मेदवार नयाँ छन्।
२०७९ को निर्वाचनमा कास्की– ३ बाट निर्वाचित दामोदर पौडेल बैरागी यसपालि पनि दोहोरिएका छन् भने २०६४ सालमा कास्की–२ बाट संविधान सभा सदस्य निर्वाचित नेपाली कम्युनिस्ट पार्टीका केन्द्रीय सदस्य राजकाजी गुरूङ ‘करण’ यसपालि कास्की– १ बाट उम्मेदवार बनेका छन्। उनीहरू बाहेक बाँकी सबै जना नयाँ उम्मेदवार छन्।
नेपाली कांग्रेसले कास्कीका ३ वटै निर्वाचन क्षेत्रमा नयाँ उम्मेदवार उठाएको छ।
कांग्रेसबाट कास्की– १ मा तिलकबहादुर रानाभाट, कास्की– २ मा माधव बास्तोला ‘मधु’ र कास्की– ३ मा मनोज गुरूङलाई उम्मेदवार बनाएको छ। यसअघि कुनै पनि निर्वाचन लड्न नपाएका उनीहरूले यसपालि प्रतिनिधि सभामा अवसर पाएका हुन्।
नेकपा एमालेबाट कास्की–१ मा उम्मेदवार बनेका बैनबहादुर क्षेत्री अधिकारी पार्टीका जिल्ला अध्यक्ष हुन्।
यसअघि २०७४ को स्थानीय निर्वाचनमा जिल्ला समन्वय समिति कास्कीको प्रमुख निर्वाचित भएका क्षेत्रीले प्रतिनिधि सभामा भने पहिलो पटक अवसर पाएका हुन्।
एमालेले कास्की–२ मा युवा नेता रश्मी आचार्यलाई टिकट दिएका छन्। पहिलो पटक आचार्यले चुनाव लड्न टिकट पाएका हुन्। यस्तै, कास्की– ३ मा अघिल्लो पटक निर्वाचित दामोदर पौडेल बैरागी नै यसपटक पनि एमालेले उम्मेदवार बनाएको छ।
नेपाली कम्युनिस्ट पार्टीले कास्की– १ मा केन्द्रीय सदस्य राजकाजी गुरूङ ‘करण’ कास्की– २ मा किरण थापा र कास्की– ३ मा प्रेम पौडेल उम्मेदवार बनेका छन्।
राष्ट्रिय स्वतन्त्र पार्टीबाट कास्की– १ मा लेखक खडकराज पौडेल ‘गनेस’, कास्की– २ मा पूर्वपत्रकार उत्तम पौडेल र कास्की– ३ मा व्यवसायी बिना गुरूङलाई उम्मेदवार उठाएको छ।
लेखक गनेस २०७९ को स्थानीय तह निर्वाचनमा पोखरा महानगरका मेयरमा स्वतन्त्र उम्मेदवारी दिएका थिए। अटेरी अभियान चलाएका गनेसले त्यतिबेला लौरो चुनाव चिह्न लिएर मेयर लडे पनि निर्वाचित हुन सकेका थिएनन्।
उज्यालो नेपाल पार्टीले पनि कास्कीका तीनवटै क्षेत्रमा उम्मेदवारी दिएको छ। कास्की– १ खगोल वैज्ञानिक मनिषा द्धा, कास्की– २ मा ऊर्जाविद् कुशल गुरूङ र कास्की– ३ मा तर्कबहादुर गुरूङलाई उम्मेदवार उठाएको छ।
यस्तै, राष्ट्रिय प्रजातन्त्र पार्टीले कास्की– १ मा बाबुराम थापा, कास्की– २ मा केन्द्रीय उपाध्यक्ष हेमजंग गुरूङ र कास्की– ३ मा केन्द्रीय सदस्य अर्जुन खनाललाई उम्मेदवार बनाएको छ।
केन्द्रीय उपाध्यक्ष गुरूङ यसअघि लमजुङबाट निरन्तर लड्दै आए पनि जित्न सकेका थिएनन्। यसपालि उनले निर्वाचन क्षेत्र कास्की रोजेका हुन्।
कास्कीका तीन वटै निर्वाचन क्षेत्रमा धरानका पूर्वमेयर हर्क साम्पाङले खोलेको श्रम संस्कृति पार्टी, राष्ट्रिय जनमोर्चा, प्रगतिशील लोकतान्त्रिक पार्टी, नेकपा माओवादी, मंगोल नेसनल अर्गनाइजेसन, नेपाल मानवतावादी पार्टी लगायतले पनि उम्मेदवार उठाएको छ।
कास्कीका तीन वटा निर्वाचन क्षेत्र मध्ये २ वटा निर्वाचन क्षेत्रमा स्वतन्त्र उम्मेदवारी पनि परेको छ।
निर्वाचन कार्यालय कास्कीका सूचना अधिकारी रूद्र न्यौपानेका अनुसार कास्की– २ मा विष्णुप्रसाद तिवारी, रामचन्द्र आचार्य, निरञ्जन कोइराला, निर्दोषविक्रम पौडेल र वसन्तराज घिमिरेले स्वतन्त्र उम्मेदवारी दिएका छन्। कास्की– १ मा कृष्णबहादुर राउतले मात्र स्वतन्त्र उम्मेदवारी दिएका छन्। कास्की– ३ मा भने एक जना पनि स्वतन्त्र उम्मेदवार छैनन्।
जिल्ला निर्वाचन कार्यालयका सूचना अधिकारी रूद्र न्यौपानेका अनुसार कास्की–१ मा कास्की २ मा १७ जना र कास्की–३ मा १५ जनाले उम्मेदवारी दर्ता गरेका छन्।
अब बुधबार उम्मेदवार विरोधमा उजुरी दिने, बिहीबार मनोनयन पत्र र उजुरी उपर जाँचबुझ गर्ने, शुक्रबार उम्मेदवारको नामावली प्रकाशन गर्ने, उम्मेदवारी फिर्ता लिने र उम्मेदवारको अन्तिम नामावली प्रकाशन गर्ने कार्यतालिका छ।
-1746009348.jpg)
