तनहुँ–१ मा फेरि राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्ले र नेपाली कांग्रेस तनहुँका नेता गोविन्द भट्टराई आमने–सामने हुने भएका छन्।
उनीहरूबीचको पुरानै प्रतिस्पर्धामा एमालेकी भगवती न्यौपाने थपिएकी छन्, जो मेयरको चुनाव हारेपछि राष्ट्रिय सभा सांसद र संघीय मामिला तथा सामान्य प्रशासन मन्त्री बनेकी थिइन्।
फागुन २१ गते हुन गइरहेको प्रतिनिधिसभा निर्वाचनमा भाग लिन उनीहरू तीनै जनाले मंगलबार निर्वाचन अधिकृतको कार्यालय पुगेर उम्मेदवारी दर्ता गरिसकेका छन्।
उम्मेदवारी दर्तापश्चात तीनै जनाले उक्त क्षेत्रको आवश्यकता सम्बोधन गर्ने, विकास निर्माण र सुशासनका एजेन्डा अघि सारेका छन्।
तनहुँ–१ बाट २०७९ को प्रतिनिधिसभा निर्वाचनमा तत्कालीन कांग्रेस वरिष्ठ नेता रामचन्द्र पौडेल निर्वाचित भएका थिए।
पौडेल राष्ट्रपति निर्वाचित भएपछि उक्त क्षेत्र खाली भयो। २०८० वैशाखमा भएको उपनिर्वाचनमा कांग्रेस छाडेका वाग्ले उक्त क्षेत्रबाट भारी मतान्तरसहित निर्वाचित भएका थिए।
पौडेलले २०७९ सालको निर्वाचनमा उक्त क्षेत्रबाट २५ हजार ३१८ मत पाउँदा एमालेका एकबहादुर राना मगरले १९ हजार ९४३ मत पाएका थिए।
पौडेल राष्ट्रपति भएपछि उक्त क्षेत्रमा भएको उपनिर्वाचनमा रास्वपाका उम्मेदवार वाग्ले अझ बढी मतान्तरसहित निर्वाचित भए।
उपनिर्वाचनमा वाग्लेले ३४ हजार ९११ मत पाउँदा कांग्रेसका भट्टराईले २० हजार १२२ मत पाएका थिए। एमालेका सर्वेन्द्र खनालले ८ हजार ४८८ मत पाएका थिए।
२०७९ सालमा भएको निर्वाचनमा पौडेल र एमालेका राना मगरबीच मतान्तर ५ हजार ३७५ थियो। २०८० सालको उपनिर्वाचनमा वाग्ले र भट्टराईबीचको मतान्तर १४ हजार ७८९ थियो।
उपनिर्वाचनको मत परिणाम हेर्दा एमालेको मत भने एक वर्षमै ह्वात्तै घटेको देखिन्छ।
विगतका चुनावी मत परिणाम जे जस्तो भए पनि यसपालि वाग्ले, भट्टराई र न्यौपाने तीनै जना निर्वाचन जित्ने दाबी गर्छन्।
चुनाव जितेर पनि मन्त्री हुन नसकेका रास्वपाका वाग्ले पहिलेभन्दा फराकिलो मतान्तरका साथ चुनाव जित्ने उद्घोष गरे।
'संघीय सांसदको रूपमा कार्यकाल पूरा नहुँदै जेनजी प्रदर्शनपछि अर्को परिस्थिति बन्यो। अपुरो कार्यकाल पूरा गर्न पाउनुपर्छ,' उनले भने, 'तनहुँको माया घट्नुभन्दा बढेको पाएपछि मैले यो ठाउँ छोड्नु हुँदैन। अझ सशक्त उम्मेदवार, अझ बढी मत ल्याएर जानुपर्छ भनेर साथीभाइको सदभाव भयो।'
मुलुकको उन्नयनका लागि समर्पित हुने भन्दै डा. वाग्लेले पहिलेभन्दा फराकिलो मतान्तर मागिरहँदा कांग्रेसका गोविन्द भट्टराईले भने मूल्यांकन गरिदिन मतदातालाई आग्रह गरे।
तनहुँ–१ का जनतालाई पदमा नहुँदा पनि सेवा गरिरहेको भन्दै उनले निर्वाचित भएपछि सेवा गर्ने क्षेत्र विस्तार हुने र सुख–दुःखमा साथ दिने वाचा गरे।
'यो क्षेत्रमा को को कहाँ कहाँ जित्नुभयो, के डेलिभरी दिनुभयो, के वाचा गर्नुभएको थियो, त्यो अनुसार काम भयो कि भएन— अहिले मूल्यांकन चाहिएको अवस्था छ,' भट्टराईले भने, 'यी कुरा विश्लेषण गरेर करेक्सन गर्ने अवसर पाउनुपर्छ। विगतको जनमत निश्चित रूपमा परिवर्तन हुन्छ।'
विगतका दुइटा निर्वाचनका मतपरिणाम हेर्दा तीव्र गतिमा मत खस्किरहे पनि एमाले नेता भगवती न्यौपाने आफू सोही क्षेत्रकी छोरी र त्यहीँ संघर्ष गरेकाले चुनाव जित्ने बताइन्।
तनहुँ–१ का जनतासँग आफ्नो गहिरो प्रेम रहेको र पसिना बगाएको भन्दै उनले राजकीय भूमिकामा रहँदा तनहुँको शिर उच्च बनाएको दाबी गरिन्।
'तनहुँमा मैले धेरै दुःख गरेको छु। जनतासँग मेरो गहिरो प्रेम छ। धेरै पसिना बगाएको छु,' उनले भनिन्, 'राजकीय जिम्मेवारी पाउँदा पनि तनहुँको शिर माथि उठाउनुपर्छ भन्ने सोचेर मैले भूमिका खेलेको छु।'
२०७४ सालको स्थानीय निर्वाचनमा भानु नगरपालिकाको मेयर हारेकी न्यौपानेलाई एमाले र माओवादी मिलेर बनेको तत्कालीन नेकपाले २०७६ माघमा राष्ट्रिय सभा सदस्य निर्वाचित गरेको थियो।
एमालेका तर्फबाट राष्ट्रिय सभाको संसदीय दलका नेता भएकी न्यौपानेलाई अध्यक्ष केपी ओलीले संघीय मामिला तथा सामान्य प्रशासन मन्त्री बनाएका थिए।
उक्त मन्त्रालय सम्हालेका मन्त्री राजकुमार गुप्ता पोखराको लिची बगैंचा घुसकाण्डमा मुछिएपछि न्यौपाने मन्त्री नियुक्त भएकी थिइन्। गुप्ता लिची बगैंचा भ्रष्टाचार आरोपमा कारागार छन्।
-1746009348.jpg)
