२०७९ सालको स्थानीय निर्वाचनबाट पोखराको मेयरमा दोहोरिन चाहेका एमाले केन्द्रीय सदस्य कृष्ण थापाले सुरूमा टिकट पाएनन्।
एमालेका अर्का नेता दीपक पौडेलले टिकट पाएपछि कृष्णले पार्टीका तत्कालीन उपमहासचिव पृथ्वीसुब्बा गुरूङका कारण टिकट नपाएको भनेर सार्वजनिक रूपमा बोलेका थिए।
जब दीपकलाई सुन चोरीको आरोप लाग्यो, उनले पाएको टिकट खोसियो। कृष्णले टिकट पाए। यद्यपि उनी निर्वाचनमा एमालेबाटै फुटेर गएका तत्कालीन नेकपा एकीकृत समाजवादीका धनराज आचार्यसँग हारे।
गएको प्रतिनिधिसभा निर्वाचनमा कास्की – २ बाट उनै कृष्णले प्रतिनिधिसभा सदस्य उम्मेदवारको टिकट पाएका थिए। पार्टीको केन्द्रीय सचिवालय बैठक सकिनासाथ हालका उपाध्यक्ष पृथ्वीसुब्बाले नै उनलाई फोन गरेर टिकट 'कन्फर्म' भएको भन्दै जितको शुभकामना दिएका थिए।
टिकट पाइसकेको भन्दै चुनावको तयारी थालिसक्दा कृष्णको टिकट खोसियो। एमाले केन्द्रीय सदस्य रश्मी आचार्यले टिकट पाए।
यसरी टिकट खोसिनुमा उनले पार्टी सचिव खगराज अधिकारीको हात भएको आरोप लगाए। यस विषयमा खगराजले हालसम्म कुनै प्रतिक्रिया जनाएका छैनन्।
यी दुई घटनाले देखाउँछ, कृष्ण एमालेका यस्ता नेता थिए जो आफूलाई लागेका कुरा निर्धक्क बोल्थे। पार्टीभित्र र बाहिर पनि निर्धक्क बोल्ने भएकाले कतिपय उनलाई हक्की स्वभावका भन्छन् त कतिपयले मुख छुच्चो गरेको भन्छन्।
जे भने पनि उनी आफूलाई लागेका कुरा बोल्ने नेतामा पर्थे। जबकि, एमालेमा कतिपय नेता तथा कार्यकर्ता नेतृत्वका गलत शैलीविरूद्ध अझै पनि खुलेर बोल्न सक्दैनन्।
एमाले कास्कीका अध्यक्ष बैनबहादुर अधिकारी क्षेत्री पनि कृष्णको स्वभाव हक्की भएको बताउँछन्।
'हाम्रा नेता कृष्ण थापाले आफूलाई लागेका कुरा कहिल्यै लुकाउनुभएन, सधैं खुलेर बोल्न सक्नुहुन्थ्यो,' उनले भने, 'जस्तोसुकै परिस्थिति पनि सामना गर्न तम्तयार हुने हक्की स्वभाव उहाँमा थियो।'
बोल्न मात्र होइन, काममा पनि उनी आफूलाई लागेको गर्थे।
एमाले कास्कीको अध्यक्षका रूपमा पार्टी जिम्मेवारी रहँदा कृष्ण सचिवलाई कार्यवाहक उपाध्यक्ष दिन्थे। उपाध्यक्ष रहेका मनबहादुर गुरूङलाई दिँदैन थिए। आफ्नो गुटभित्र नभएकाले मनबहादुरलाई उनी पन्छाउँथे। यही विषयमा अध्यक्ष कृष्ण र उपाध्यक्ष मनबहादुरबीच बोलचाल नै बन्द भएको थियो।
२०५४ सालको स्थानीय निर्वाचनमा पोखराका मेयर जितेका कृष्णले त्यसपछि नै पार्टीभित्र र बाहिर शक्ति आर्जन गरेका हुन्। कृष्ण मेयर हुँदा पहिलो पटक पोखरामा एसियाली विकास बैंक (एडिबी) को सहयोगमा नाली बनाउनेदेखि ल्यान्डफिल साइट बनाउने काम गरेका थिए। जुन ल्यान्डफिल पोखरा अन्तर्राष्ट्रिय विमानस्थल सञ्चालनमा आएपछि बन्द गरिएको छ भने फोहोर सडकमा थुप्रिएको छ।
तत्कालीन उपमेयर क्याप्टेन मानबहादुर गुरूङ पनि कृष्ण हक्की स्वभावको भएको बताउँछन्। मेयर रहँदा कृष्णले आफूलाई ठीक लागेका काम गर्न अगाडि सर्ने र मरिमेट्ने स्वभाव भएको उनको सम्झना छ।
'मेरो कार्यकालमा मेयर रहनुभएका कृष्ण थापा हक्की हुनुहुन्थ्यो, बोल्न डराउनुहुन्थेन,' उनले भने, 'उहाँलाई लागेको काम गर्न मरिमेट्ने, कसैसँग पछाडि नहट्ने स्वभाव थियो।'
एमाले कास्की अध्यक्ष बैनबहादुर क्षेत्री र कृष्णबीच करिब ४० वर्षदेखि सहकार्य हुँदै आएको थियो। २०४३ सालमा भएको निर्वाचनमा एमालेका अर्का नेता सोमनाथ अधिकारी 'प्यासी' जनपक्षीय उम्मेदवार बन्दा कृष्ण चुनावी कमान्डर बनेका थिए।
पञ्चायती व्यवस्था विरूद्ध भूमिगत राजनीति गरेका कृष्णलाई तत्कालीन पञ्चायती सरकारले 'अराष्ट्रिय तत्व' भन्दै पक्राउ गरेर जेल हालेका थिए। २०४३ मंसिरमा पक्राउ परेका कृष्णले कास्की कारागारमा २९ महिना जेल जीवन बिताएका थिए। जहाँ झापा विद्रोहका नेता केपी शर्मा ओली पनि थिए। ओली अहिले एमाले अध्यक्ष छन्।
'पञ्चायतले कृष्णलाई जेल कोच्दा हाम्रो अध्यक्ष केपी ओली पनि कास्की कारागारमै हुनुहुन्थ्यो,' बैनबहादुर भन्छन्, 'उहाँहरू सँगसँगै जेल बस्नुभएको हो।'
२०४७ सालमा लोकतन्त्र पुनर्स्थापना भएपछि कृष्णले पार्टीबाट पाउनुपर्ने अवसरले छाडेन। त्यसपछि भएका अधिकांश निर्वाचनमा चुनाव लडेका कृष्ण २०५४ को स्थानीय निर्वाचनमा पोखराको मेयर जिते। त्यसपछि २०७४ को प्रदेशसभा सदस्य जिते।
निर्वाचन बाहेक २०५१ सालमा पोखरा उपत्यका नगर विकास समिति अध्यक्ष नियुक्त भएका कृष्ण २०७१ सालमा राष्ट्रिय ताल समितिका सदस्य बनेका थिए।
पोखराको मेयर हुँदा कृष्णमाथि कार्यकर्ता भर्तीको आरोप लागेको थियो। उनले त्यति बेला पार्टीका सयौं कार्यकर्तालाई महानगरमा भर्ती गरेका थिए। यसैमध्यै एक हुन्, पोखरा महानगरका वरिष्ठ कानुन अधिकृत नारायण शर्मा।
मेयर कृष्णका स्वकीय सचिव रहेका नारायणलाई कार्यकाल सकिएपछि महानगरमै कानुन हेर्ने गरी नियुक्ति दिए। त्यसपछि माओवादी द्वन्द्वका कारण लामो समय स्थानीय निर्वाचन हुन पाएन। त्यही मौकामा तत्कालीन पोखरा उपमहानगरपालिकाले कर्मचारी बढुवासम्बन्धी कार्यविधि ल्याएर नारायण वरिष्ठ कानुन अधिकृतमा बढुवा भएका थिए।
एमाले कास्कीका अध्यक्ष बैनबहादुरका अनुसार कृष्ण बिहीबार प्रतिनिधिसभा कास्की क्षेत्र नम्बर १ को समीक्षा बैठकमा ढिलो गरी पुगेका थिए। पार्टीको जिल्ला कार्यालयमा भएको समीक्षामा अन्तिममा आइपुग्दा कृष्णले आफू घाट पुगेर आएको बताएका थिए।
'उहाँ अर्का एक जनाको मृत्यु भएकाले घाट पुगेर आउँदा ढिला भयो भन्नुभएको थियो,' अध्यक्ष बैनबहादुरले भने, 'ढिलो आउनुभयो र थोरै बोल्नुभयो त्यस्तै ५–७ मिनेट।'
बैठकमा कृष्णलाई पार्टीका केही नेता तथा कार्यकर्ताले चुनावमा असहयोग गरेको आरोप लगाएका थिए। आफूले पाएको टिकट खोसिएकै कारण असन्तुष्टि पोखेका कृष्णमाथि यस्तो आरोप लागेपछि उनले बैठकमै जबाफ दिएका थिए।
पार्टीको बैठकमा चुनावमा पराजय बेहोर्नुको जिम्मा आफूले लिने र पार्टीले साधारण सदस्यसमेत नरहने गरी कारबाही गरे पनि भोग्न तयार रहेको जबाफ उनले दिएका थिए।
'चुनावी कमान्डरका हैसियतमा म पराजयको जिम्मेवारी लिन्छु र पार्टीले साधारण सदस्यसमेत नरहने गरी कारबाही गरे पनि स्वीकार गर्छु भनेर उहाँ (कृष्ण थापा) ले भन्नुभएको थियो,' बैठकमा सहभागी एक नेताले भने।
बैठक सकिएर कुर्चीमा बसिरहेका बेला साथीहरूसँग हात मिलाउने र गफगाफ भइरहेको थियो।
बैठकपछि उनीहरू खाना खान जाने तयारी गर्दै थिए। कुर्सीबाट उठ्न खोज्दा कृष्ण थचक्क बस्न पुगेको बैनबहादुरले जानकारी दिए।
कास्की– १ मा प्रतिनिधिसभा सदस्य उम्मेदवारसमेत रहेका बैनबहादुरले बैठक सौहार्द रूपमा सकिएको र खाना खान जाने बेला अचानक कृष्णलाई हृदयघात भएको बताए।
हृदयघात हुनासाथ पोखराकै मणिपाल शिक्षण अस्पताल पुर्याउँदा चिकित्सकले कृष्णलाई मृत घोषणा गरेका थिए।
कास्कीमा एमालेको मजबुत संगठन निर्माण गरेका कृष्णको निधनले पार्टीका 'बफादार सिपाही' झैं काम गर्ने नेता गुमाउनुपरेको बैनबहादुरले बताए।
'कास्कीमा असामयिक र अप्रत्याशित रूपमा यो घटना भयो। यसले नेकपा एमालेलाई अपूरणीय क्षति पुगेको छ,' उनले भने।
-1746009348.jpg)
