फागुन २१ गते भएको प्रतिनिधि सभा निर्वाचनमा उठेका आफूसहित सबै पदाधिकारी पराजित भएपछि त्यसको जिम्मेवारी लिँदै नेपाली कांग्रेसका सभापति गगन थापाले पदबाट राजीनामा दिएका छन्।
सभापति थापाले बुधबार उपसभापति विश्वप्रकाश शर्मासमक्ष राजीनामा बुझाएका हुन्।
चुनावी समीक्षालगायत विषयमा छलफल गर्न केन्द्रीय समिति बैठक आह्वान भएपछि सभापति थापाले पदबाट राजीनामा दिएका थिए।
सभापति थापा सर्लाही ४ बाट पराजित भएका थिए।
लगत्तै काठमाडौं आएपछि थापाले उपसभापति शर्मासँगको भेटमा चुनावी पराजयको जिम्मेवारी लिँदै पदबाट राजीनामा दिने बताए पनि शर्माले तत्काल नदिन सुझाव दिएका थिए।
यो पनि: गगन थापाले भने- म राजीनामा दिन्छु
समानुपातिकतर्फ २० सिटमा पार्टीले बुझाएको सूचीबाट निर्वाचन आयोगलाई उम्मेदवार सिफारिस गर्ने काम सकेपछि थापाले सभापति पदबाट राजीनामा दिएका छन्।
चुनावी समीक्षा गर्न कांग्रेसले भोलि दिउँसो १ बजेका लागि केन्द्रीय समिति बैठक आह्वान गरेको छ।
विशेष महाधिवेशन गरेर छोटो समयको तयारीबीच थापाको नेतृत्वमा कांग्रेस प्रतिनिधि सभा निर्वाचनमा होमिएको थियो। गत पुस ३० गते विशेष महाधिवेशनबाट थापा सभापति बनेका थिए।
त्यसको एक सातामै प्रतिनिधि सभा निर्वाचनका लागि उम्मेदवारी दर्तको कार्यक्रम थियो।
माघ ६ गते कांग्रेसले १६५ निर्वाचन क्षेत्रमै उम्मेदवारी दिएको थियो।
तर फागुन २१ को चुनावमा १८ क्षेत्रमा मात्रै जितेको थियो।
प्रत्यक्षतर्फ १८ र समानुपातिकतर्फ २० गरी कांग्रेसले ३८ सिट जित्दै दोस्रो भएको छ भने रास्वपा झन्डै दुई तिहाइ सिटसहित पहिलो पार्टी बनेको छ।
सभापति थापा नेतृत्वमा चुनावमा जाँदा पार्टीले पराजय भोग्नुपरेको भन्दै निवर्तमान सभापति शेरबहादुर देउवा पक्षले सभापति पदबाट थापाको राजीनामा माग गरिरहेको थियो भने थापाले चुनावी पराजयको जिम्मेवारी लिँदै राजीनामा दिने बताइरहेका थिए।
देउवा पक्ष विशेष महाधिवेशनमा सहभागी भएको थिएन भने यसलाई लिएर सर्वोच्च अदालतसमेत गएको थियो। यो मुद्दा अझै सर्वोच्चमा विचाराधीन छ।
कांग्रेसमा नियमित महाधिवेशनको पनि माग भइरहेको छ। विशेष महाधिवेशन भएको एक वर्षभित्र नियमित महाधिवेशन गर्नुपर्ने हुन्छ।
सभापतिबाट थापाले राजीनामा दिँदा लेखेका कुरा-
विशेष महाधिवेशनपछि पार्टी सभापतिको जिम्मेवारी सम्हाल्दै अत्यन्त छोटो समयमै निर्वाचनमा पार्टीको नेतृत्व गर्नु मेरो लागि अवसर र चुनौती दुवै थियो।
विशेष महाधिवेशनले केवल नेतृत्व परिवर्तन मात्र गरेको थिएन, त्यो नेपाली कांग्रेसभित्र बहुआयामिक सुधार र आत्मसमीक्षाको सुरूवात पनि थियो।
पार्टीभित्र सुरू भएको परिवर्तनले कार्यकर्तामा उत्साह जगाए पनि आम मतदातासम्म ‘बदलिएको कांग्रेस’ को सन्देश प्रभावकारी रूपमा पुर्याउन पर्याप्त समय प्राप्त हुन सकेन।
यसपटकको परिणामका प्रमुख कारणहरूमध्ये समयको यो सीमितता मुख्य कारण रहेको मेरो बुझाइ छ।
म स्पष्ट छु- यदि विशेष महाधिवेशन सम्पन्न नभई निर्वाचनको सामना गर्नुपरेको भए परिस्थिति र परिणाम अझ प्रतिकूल हुन्थ्यो। तथापि यस निर्वाचनमा पार्टी मेरो नेतृत्वमा सहभागी भएको थियो, त्यसैले मैले कति समय जिम्मेवारी सम्हालेँ वा कुन अवस्थामा सम्हालेँ वा नसम्हालेको भए के हुन्थ्यो भन्ने विषय गौण हो। वर्तमान परिणामप्रतिको जबाफदेहिता मेरो हो भन्नेमा म पूर्णतः स्पष्ट छु।
निर्वाचन सम्पन्न भएलगत्तै मैले राजीनामा दिने मनस्थिति बनाएको थिएँ तर निर्वाचनसँग सम्बन्धित आफ्नो जिम्मेवारीसँग जोडिएका अन्य आवश्यक कार्यहरू सम्पन्न गर्नुपर्ने भएकोले ती सम्पन्न गर्नासाथ मैले यो राजीनामा पेस गरेको हुँ।
आगामी दिनहरूमा म देशका विभिन्न भागमा पुगेर पार्टीका साथीहरूसँग र आम नागरिकसँग संवाद गर्नेछु, उहाँहरूको भावना बुझ्नेछु र सुझाव सुन्नेछु। नेपाली कांग्रेसको पुनर्निर्माण तथा सुदृढीकरणको यात्रामा सक्रिय रूपमा थप उर्जाका साथ संलग्न रहनेछु।
आज मैले पार्टीको सभापति पदबाट राजीनामा दिने निर्णय गरेको हुँ, तर पार्टी सुधार र पुनर्निर्माणको यात्राबाट अलग भएको छैन।
त्यसैले मेरो यो निर्णय अन्त्य होइन- यो त नेपाली कांग्रेसको आत्मसमीक्षा, जबाफदेहिता र पुनर्जागरणतर्फको एउटा प्रारम्भिक कदम हो।
-1746009348.jpg)
