नेकपा एमाले महासचिव शंकर पोखरेलले 'मिसन पार्टी जागरण' पार्टी निर्माणको महत्त्वपूर्ण अभियान भएकाले सबै पालिकामा सुरू गर्न निर्देशन दिएका छन्।
पार्टीको प्रदेश कमिटीका पदाधिकारी र मिसन पार्टी जागरणका केन्द्रीय प्रतिनिधिहरूसँगको भर्चुअल बैठकलाई सम्बोधन गर्दै महासचिव पोखरेलले सोमबार उक्त निर्देशन दिएका हुन्।
पार्टीको जनतासँग टुटेको सम्बन्ध जोड्ने उद्देश्यका साथ सुरू गरिएको यो अभियान सफल पार्न पार्टी कमिटी मात्र नभई जनसंगठनहरू पनि परिचालन गर्ने योजना बनाइएकाले त्यसै अनुसार परिचालित हुन उनले आग्रह गरे।
जागरण अभियानमा जिल्ला कमिटीहरूको बैठक गरी कार्यक्रम बनाई अगाडि बढाइँदै छ। पार्टीले पालिका तहसम्म केन्द्रीय प्रतिनिधि खटाएको छ।
महासचिव पोखरेलले पार्टी विस्तारको दायरा फराकिलो बनाउन र वर्ग, समुदाय र पेसागत क्षेत्र समेटेर जागरण अभियान सम्पन्न गर्न सुझाव दिए।
पार्टी सुदृढ बनाउन विचार, संगठन र नेतृत्वमा पुनर्गठन आवश्यक हुने सन्दर्भमा आफ्नो भनाइ राख्दै उनले पार्टी सुदृढ बनाउन विचारधाराको महत्त्वपूर्ण भूमिका हुने हुँदा जनताको बहुदलीय जनवादलाई समृद्ध बनाउँदै आएको स्मरण गराए।
महासचिव पोखरेलले संगठनात्मक पुनर्गठनको काम तलैदेखि गर्नुपर्नेमा पनि जोड दिए। पार्टीका स्थानीय कमिटीहरू चलायमान बनाउने कुरामा ध्यान दिन जरूरी रहेको र त्यसका लागि कमिटीहरू पुनर्गठन, कमिटीमा रिक्त रहेका स्थान पूर्ति लगायतका काम गर्न उनले निर्देशन दिए।
पार्टीमा युवा सहभागिता वृद्धिका लागि विगतमा युवा परिचालन, युवाको नेतृत्व विकास, युवालाई कमिटीमा आरक्षण लगायत नीति अघि सारिएको तर व्यवहारमा लागू हुन नसकेको औल्याउँदै महासचिव पोखरेलले पार्टी जागरण अभियान पनि निर्देशन नै निर्देशनमा समय नगुज्रियोस् भन्नेतर्फ ध्यानाकर्षण गराए।
उनले पार्टीलाई नयाँ ढंगले अघि बढाउने सन्दर्भमा एकताबद्ध बनाएर सुधार र रूपान्तरण गरिने र त्यो काम संस्थागत निर्णयबाट हुने प्रस्ट पारे।
पार्टी सदस्यता नवीकरणको कामलाई सफल बनाउन आग्रह गर्दै समस्या भए पार्टी केन्द्रबाट थप सहजीकरण हुने उनले बताए।
महासचिव पोखरेलले मुलुकको वर्तमान राजनीतिक परिस्थितिबारे जानकारी गराउँदै शासकीय अनुभव नभएका मानिसहरू सरकारमा पुगेकाले देश यतिबेला संकटको अवस्थामा गुज्रिरहेको र विभिन्न स्वार्थ समूहहरूले आफ्नो सक्रियता बढाइरहेको उल्लेख गरे।
उनले सरकार सुरूदेखि पूर्वाग्रह र प्रतिशोधपूर्ण ढंगले अघि बढेको र नियम-कानुन लत्याएर स्वेच्छाचारी शासन व्यवस्थातिर उन्मुख रहेकाले कुनै पनि बेला सडक आन्दोलनमा जानुपर्ने हुँदा तयार हुन पनि मातहत कमिटीलाई निर्देशन दिए।
भर्चुअल बैठकमा पार्टीका सचिव तथा संगठन विभाग प्रमुख भानुभक्त ढकालले पार्टी सदस्यता नवीकरणको प्रारम्भिक रिपोर्टबारे जानकारी गराउँदै नवीकरणको काम उत्साहप्रद रहेको बताए।
सदस्यता नवीकरणको समयसीमा असार मसान्तसम्म रहे पनि यो पार्टी कामको महत्त्वपूर्ण पाटो भएकाले यसलाई निरन्तरता दिनुपर्नेमा उनले जोड दिए।
बैठकमा प्रदेश अध्यक्षहरूले मिसन पार्टी जागरण अभियान, पार्टी सदस्यता नवीकरण लगायत विषयमा रिपोर्टिङ गरेका थिए।
