नेपाली कांग्रेसले सुनसरी र मधेसका विभिन्न जिल्लामा भएका घटना छानबिनका लागि न्यायिक समिति गठनको माग गर्ने निर्णय गरेको छ।
आज सिंहदरबारस्थित संसदीय दल कार्यालयमा बसेको संसदीय दल बैठकले प्रतिनिधि सभा र राष्ट्रिय सभाबाट न्यायिक समिति गठनको माग गर्ने निर्णय गरेको हो।
‘पछिल्लो समय मधेसमा भएका घटनाबारे गृह मन्त्रालयले बनाएको समितिले छानबिन गर्न सक्दैन, त्यो गम्भीर घटना छ र स्वतन्त्र तथा निष्पक्ष छानबिन गरिनुपर्छ,’ संसदीय दल बैठकपछि महामन्त्री प्रदीप पौडेलले भने, ‘प्रतिनिधि सभा र राष्ट्रिय सभामा हामी न्यायिक समिति गठनको अडान राख्छौं।’
तीन जनाको मृत्यु र थुप्रै व्यक्ति घाइते भएको घटनामा संसदीय दलले दु:ख पनि व्यक्त गरेको छ।
‘घटनाको निष्पक्ष छानबिनका लागि सरकारले न्यायिक समिति बनाउनुपर्छ,’ संसदीय दल नेता भीष्मराज आङ्देम्बेले भने, ‘भविष्यमा यस्ता घटना दोहोरिन नदिन सबै पक्षमा अपिलसमेत गर्दछौं।’
उनकाअनुसार कांग्रेसले यस विषयमा अन्य प्रतिपक्षी दलहरूको पनि साथ र सहयोग लिनेछ।
प्रमुख सचेतक बासना थापाका अनुसार आजको बैठकबाट नागरिक, सांसद र संसदबीच सम्बन्धलाई थप प्रभावकारी बनाउन सांसद समन्वयबारे कार्यादेश पनि पारित गरेको छ।
-ink-1777278594.jpeg)
