नेपाली कांग्रेसले प्रधानमन्त्रीको सर्वदलीय, सर्वधार्मिक र नागरिक संवाद संयन्त्र गठन गर्न सुझाव दिएको छ।
आजको प्रतिनिधि सभा बैठकमा बोलेका सचेतक निश्कल राईले यस्ता संयन्त्रमा धार्मिक समुदाय, स्थानीय सरकार, सुरक्षा निकायको पनि प्रतिनिधित्व हुनुपर्ने बताए।
‘यस्ता घटनापछि प्रधानमन्त्रीज्यूको नेतृत्वमा स्थायी प्रकृतिको सर्वदलीय, सर्वधार्मिक र नागरिक संवाद संयन्त्र गठन गरियोस्,’ सुनसरी र मधेसका केही जिल्लामा हालै भएका दुई पक्षबीचको तनावको स्थितितर्फ लक्ष्य गर्दै उनले भने।
उनले कुनै धर्म वा समुदायलाई सामूहिक शंकाका रूपमा हेर्न नहुने र सामाजिक सञ्जालमा भ्रम फैलाउनेहरूमाथि कारबाही गरिनुपर्ने पनि बताए।
सरकारलाई उनले सहयोगी, पारदर्शी र खुला बन्न पनि आग्रह गरेका छन्।
यस्ता घटनाहरूमा सरकारले गरेका सहमति, तिनको संवैधानिक आधारसहित कार्यान्वयन प्रक्रियाबारे सदनमा जानकारी दिइनुपर्ने उनको भनाइ थियो। संवेदनशील निर्णयहरू राष्ट्रिय संवादबाट गर्न पनि उनले आग्रह गरेका थिए।
‘असहमति निषेध गरेर एकता कायम गर्न सकिँदैन, विश्वासले दीगो समाधान दिन सक्छ,’ उनले भने।
