श्रम संस्कृति पार्टीका अध्यक्ष एवं दलको नेता हर्कराज राईले सभामुख डोलप्रसाद अर्याललाई प्रधानमन्त्री बालेन्द्र शाहको विवादास्पद अभिव्यक्ति रेकर्डबाट नहटाएको विषयमा प्रश्न सोधेका छन्।
जेठ १७ गते प्रधानमन्त्री बालेन्द्र शाहले प्रतिनिधि सभाको बैठकमा नेपालले पनि भारतको जग्गा मिचेको अभिव्यक्ति दिएका थिए। उक्त अभिव्यक्ति प्रधानमन्त्रीले सच्याउनुपर्ने र संसदको रेकर्डबाट हटाउनुपर्ने माग विपक्षी दलहरूले गर्दै आएका छन्।
प्रधानमन्त्री शाहले उक्त अभिव्यक्तिको विषयमा अहिलेसम्म संसदमा आएर कुनै जबाफ दिएका छैनन्। त्यस्तै सभामुख अर्यालले दुई महिना बित्दा समेत उक्त अभिव्यक्ति संसदको रेकर्डबाट हटाएका छैनन्।
'थुप्रै दिनदेखि प्रधानमन्त्रीको अभिव्यक्ति सच्याउनुपर्छ भन्ने मागका साथ विरोध गरिरहेका छौँ। यो रेकर्डबाट पनि हटाइएको छैन,' नेता राईले बैठकमा सभामुखलाई सम्बोधन गर्दै भने, 'तपाईंलाई पनि नेपालले भारतको भूमि मिचेको छ भन्ने लागेको हो र मेटाउनुभएको छैन कि के हो? यहाँले पनि भनिदिनुहोला।'
उनले सरकारले बोलेको र नसुनेको बताए।
'हामी यहाँ आउँछौँ र बोल्छौँ। कि बोलेपछि सुन्नुपर्ने। सुनेपछि बुझेर सहमति हुनुपर्ने हो,' राईले भने, 'राज्य भनेको सहमति हो। सरसल्लाह हो।'
उनले आफूलाई जनकपुरस्थित जानकी मन्दिर प्रवेशमा अवरोध गरिएको विषय पनि उठाए।
'एउटा सांसदलाई आफ्नै देशमा निर्वाध घुमफिर गर्न पाउने अधिकार हुनु जरूरी छ,' साम्पाङले भने, 'जनकपुरमा एउटा समूहले निषेध गर्न कोसिस गर्यो। यो कस्तो राज्य हो। कानुनी राज्य हो कि जंगली राज्य हो? मेरो घरमा नआइज। मेरो घरको बाटो नहिँड भन्ने अभिव्यक्ति र व्यवहार भएको छ।'
उनले साउन ५ गते जनकपुर जाँदा श्रम संस्कृति पार्टीका कार्यकर्ता (श्रमदाता) माथि कुटपिट भएको बताए।
'गृहमन्त्रीलाई फोन गरेर भनेँ। कारबाही भयो कि भएन,' राईले सोधे, 'हुन्छ कि हुँदैन?'
उनले गृहमन्त्रीले हिन्दू सम्राट सेना नामक संगठनसँग वार्ता गरेकोमा पनि प्रश्न उठाए।
'गृहमन्त्री एउटा समूहसँग वार्तामा बस्नुभएछ। त्यो समूहको नाम सेना रहेछ। हिन्दू सम्राट सेना,' राईले भने, 'मैले बुझेको नेपाल भन्ने सार्वभौम मुलुक हो। त्यहाँ एउटा मात्र सेना छ। नेपाली सेना। अब यसरी ठाउँ ठाउँमा सेना गठनको छुट कसले कसलाई दिएको हो। सेना गठन गर्न पाउने मापदण्ड के हो। यो देशमा एउटा मात्र सेना रहने हो भने विभिन्न सेना नामका समूहलाई निषेध गर्नुपर्छ। वार्ता नै गर्नुहुन्न।'
उनले सुनसरी घटनाको सत्यतथ्य छानबिन गर्न माग गरे।
'त्यो हदसम्म घटना विकराल हुनुअघि प्रोएक्टिभ भएर काम गर्नुपर्छ,' राईले भने, 'सुरूआतमा घटनामा ध्यान नदिँदा केही मानिसहरूको ज्यान गयो। आउँदा दिनहरूमा आगो सल्किएर डढेलो सल्कनु अघि प्रोएक्टिभ भएर काम गरोस्।'
