सत्तारूढ राष्ट्रिय स्वतन्त्र पार्टी (रास्वपा) का सांसद राजुनाथ पाण्डेले ड्युटीमा रहेका नेपाली सेनाका एक क्याप्टेनलाई हप्कीदप्की गरेको भिडिओ सार्वजनिक भएपछि उनको व्यापक आलोचना भइरहेको छ।
गोकर्णेश्वर नगरपालिका–४ स्थित सडकको ट्र्याक खोल्न जाँदा सोमबार सांसद पाण्डेले त्यहाँ खटिएका सैनिक क्याप्टेनसँग विवाद गर्नुका साथै उनलाई हप्कीदप्की गरेको भिडिओ सामाजिक सञ्जालमा भाइरल बनेको हो।
ट्र्याक खोल्नुपर्ने ठाउँमा ब्यारेकको पर्खाल परेकाले त्यसलाई डोजर लगाएर भत्काउन सांसद पाण्डेले क्याप्टेनलाई निर्देशन दिएको भिडिओमा देखिन्छ।
सेनाका अधिकारीले सांसदको निर्देशन लिँदैनन्। त्यो उनीहरूको 'चेन अफ कमान्ड' भन्दा बाहिर पर्छ। उनलाई कुनै पनि निर्णय कार्यान्वयन गर्न आफूभन्दा माथिको 'चेन अफ कमान्ड' ले आदेश दिनुपर्छ। त्यस्तो आदेशबिना सांसद वा अरू कसैको निर्देशन पालना गर्दा उसमाथि नै आन्तरिक कारबाही हुन सक्छ।
सेनाको यो प्रणाली ठाडै लत्याउँदै सांसद पाण्डेले लिखित आदेशबिना ब्यारेकको पर्खाल भत्काउन फिल्डमै गएर निर्देशन दिएको उक्त भिडिओमा देखिन्छ।
त्यसपछि ती सैनिक क्याप्टेनले आफूलाई लिखित आदेश चाहिने भन्दै चिठी माग गर्छन्।
सांसद पाण्डेले भने 'चिठ्ठी आउँदै गर्छ, पर्खाल भत्काउनू' भन्दै एकोहोरो जिद्दी गरेको सुनिन्छ।
क्याप्टेन मान्दैनन्।
त्यसपछि पाण्डे भन्छन्, 'नेपाल ट्रस्टलाई सोध्नुस् न, तपाईंलाई चिठ्ठी किन चाहियो?'
ती सैनिक अधिकारी ब्यारेकमा आफ्नो फौज र केही वन्यजन्तु समेत रहेकाले तत्काल पर्खाल भत्काउन सकिँदैन भनेर सम्झाउन खोज्छन्। एक्कासि पर्खाल भत्काउँदा भित्र रहेका वन्यजन्तु भागे भने अर्को समस्या आउने कुरा पनि गर्छन्।
यसको जबाफमा पाण्डे ठाडो स्वरमा भन्छन्, 'फौज बसेर के भयो त? भित्र फौज बसेको छ, केही सेक्युरिटी प्रब्लम छैन।'
सैनिक अधिकारीले चिठी नआउञ्जेल डोजर नचलाऊँ भनेर सांसद पाण्डेसँग बारम्बार अनुनय गरेको भिडिओमा देखिन्छ।
सांसद पाण्डे भने तैपनि मान्दैनन्।
उनी ठाडो स्वरमा चर्किँदै भन्छन्, 'रोकिँदैन, यो डोजर रोकिँदैन, मैले स्पष्ट आदेश लिएर आएको छु, कन्फ्युजन भए सोध्नुहोला।'
यसरी सांसद पाण्डेले सामान्य शिष्टाचार समेत नराखी कुनै लिखित आदेशबिना ब्यारेकको पर्खाल भत्काउन हप्कीदप्की गरेको भिडिओ भाइरल भएपछि हामीले यसबारे उनीसँग प्रश्न गर्यौं।
घटनाबारे प्रतिक्रिया दिँदै सांसद पाण्डेले त्यो ठाउँमा लामो समयदेखि ट्र्याक खुलाउने प्रयास भइरहे पनि खुल्न नसकेको र सोमबार अधिकारसम्पन्न बागमती सभ्यता एकीकृत विकास समितिको टोलीले नै गएर पर्खाल भत्काएको बताए।
'स्थानीय जनताले १५/२० वर्षदेखि रोकिएको त्यो करिडोर खोल्न माग गर्दै आएका थिए। अधिकारसम्पन्न बागमती सभ्यता विकास समितिको टोली त्यहाँ डोजर लिएर गएको थियो। म पनि पुगेको थिएँ,' उनले सेतोपाटीसँग भने, 'त्यो जग्गा नेपाल ट्रस्टको हो। त्यहाँको करिडोर दुवैतर्फ खुलिसकेको भए पनि त्यही एउटा ठाउँमा खुल्न बाँकी थियो।'
करिडोरमा पर्ने सैनिक ब्यारेकको पर्खाल भत्काउन आफूले बागमती सभ्यता विकास समितिका अध्यक्ष आनन्दसिंह भाटलाई सेनासँग समन्वय गर्न भनेको पनि उनले जानकारी दिए।
त्यसैबीच ब्यारेकका क्याप्टेन आएपछि वादविवाद भएको उनको भनाइ छ।
'समितिका अध्यक्षलाई सेनासँग समन्वय गर्न भनिएको थियो। क्याप्टेन साहबले मसँग भन्दा समिति र ट्रस्टका अधिकारीसँग कुरा गर्नुपर्थ्यो। यसमा उहाँहरूको पनि कमजोरी देखिन्छ। सेनाको युनिफर्म लगाएर भिडमा आउने होइन,' उनले भने।
सुरूमा सूचना नपुगे पनि त्यो घटना भएको करिब दुई मिनेटपछि नै कर्णेल आफै फिल्डमा आएर आदेश प्राप्त भएको जानकारी दिएको र त्यसपछि नेपाली सेना र स्थानीय मिलेर बाटो खोलेको पाण्डेको भनाइ छ।
'दुई मिनेट हो सूचना नपुगेको। दुई मिनेटपछि कर्णेल गंगा बराल आउनुभएको थियो। उहाँले आदेश आयो भन्नुभयो र त्यसपछि नेपाली सेना र हामी मिलेर बाटो खोल्यौं,' उनले भने।
उनले अगाडि भने, 'मेरो लागि जनता नै सबभन्दा ठूलो कुरा हो। नेपाली सेना विषम परिस्थितिमा खटिने सम्मानित संस्था हो, सेनाप्रति मेरो पूर्ण सम्मान छ।'
नेपाली सेनाका प्रवक्ता सहायक रथि राजाराम बस्नेतले उक्त घटनाबारे स्थानीय निकायहरूसँग आवश्यक समन्वय भइरहेको बताएका छन्।
'विस्तृत विवरण आउन बाँकी छ, तर सम्बन्धित निकायहरूसँग समन्वय भइरहेको छ,' उनले भने।
हामीले गोकर्णेश्वर नगरपालिका–४ का वडाध्यक्ष जयराम महतसँग कुरा गर्दा उनले यो बाटो खुलेपछि गोकर्णेश्वरका विभिन्न वडासहित काठमाडौंको पूर्वी भेग, सिन्धुपाल्चोक र नुवाकोटका बासिन्दालाई आवतजावतमा ठूलो राहत पुग्ने बताए।
'यो माकलबारी करिडोरमा पर्ने बाटो हो। यो बाटो खोल्दा गोकर्णेश्वर १, २, ३ र ४ वडाका जनता लाभान्वित हुन्छन्। त्यसबाहेक कागेश्वरीको पूर्वी भेग, शंकरापुर, मेलम्ची हुँदै सिन्धुपाल्चोक र नुवाकोट समेतका विभिन्न ठाउँ जान सहज हुन्छ,' उनले भने, 'यो बाटो खोल्न धेरै अगाडिदेखि नै पहल भइरहेको थियो। त्यहाँ नेपाल ट्रस्टको जीर्ण अवस्थामा रहेको पर्खाल थियो। हिजो भत्काइएको हो।'
यसबारे प्रधानमन्त्री कार्यालय र सरोकारवाला निकायसँग छलफल गरेपछि नै पर्खाल भत्काउन डोजर लिएर गएको जानकारी आफूले पाएको उनले बताए।
'सैनिक अधिकारीले आफ्नो ड्युटी निर्वाह गरेका हुन्। माननीयज्यू, समिति र सम्बन्धित निकायले प्रधानमन्त्रीको निर्देशनमा गरेको भन्नुभएको छ,' वडाध्यक्ष महतले भने।
