राष्ट्रिय स्वतन्त्र पार्टीकी सांसद नितिमा कार्की भण्डारीले किसानहरूले मागअनुसार मल नपाएको गुनासो गरिरहेको उल्लेख गर्दै समस्या समाधानका लागि विकल्प प्रस्तुत गरेकी छिन्।
प्रतिनिधि सभाको आजको बैठकमा सांसद कार्कीले निजी क्षेत्रलाई मत आपूर्तिको जिम्मेवारी दिनुपर्ने बताइन्।
पहिलो, कार्कीले किसान परिचयपत्रको व्यवस्था गर्न माग गरेकी छिन्।
'किसानहरूले मागअनुसार रासायनिक मल नपाएको र वितरण प्रणाली प्रभावकारी नभएको पीडा सुनाउनु भएको छ', कार्कीले भनिन्, 'वडा तहबाट डिजिटल सिस्टममा आधारित किसान परिचयपत्र बनाएर मल वितरण गर्ने सबल प्रणाली बनाइयोस्।'
दोस्रो, सरकारले निजी क्षेत्रलाई मल आपूर्तीको जिम्मा दिइयोस्।
'सरकारले मूल्य र गुणस्तर निर्धारण गरी कडा नियमनसहित निजी क्षेत्रलाई पनि मल आयातको अनुमति देओस्', कार्कीले भनिन्।
तेस्रो, किसानले निजी क्षेत्रबाट खरिद गरेको बिलका आधारमा परिचयपत्र अनुसार अनुदान रकम फिर्ता गर्ने वा खरिदकै समयमा बिलमै समायोजन गर्ने व्यवस्था मिलाइयोस् भन्ने उनको भनाइ छ।
