राष्ट्रिय सभाको आजको बैठकमा मन्त्रालयगत प्रश्नोत्तर भइरहेको छ।
सुरूमा गृहमन्त्री सुधन गुरूङमाथि सांसदहरूले प्रश्न सोधे।
नेपाली कम्युनिस्ट पार्टीका सांसद विष्णुबहादुर विश्वकर्माले रोस्ट्रममा उभिएका गृहमन्त्री सुधन गुरूङलाई 'कञ्चनपुरकी निर्मला पन्त घटनाको दोषी पत्ता लगाएर न्याय दिन नसक्नुको कारण के हो र कहिलेसम्म सरकारले न्याय दिलाउँछ?' भनेर प्रश्न सोधे।
जबाफमा गृहमन्त्री गुरूङले यो विषय संवेदनशील रहेको बताए।
‘यो विषय संवेदनशील छ। यो प्रश्न हजुरलाई पनि गर्न चाहन्छु, हजुरहरू सत्तामा हुँदा किन नगर्नुभएको? अहिले हामीलाई त्यो भारी बोकाउँदै गर्दा यो संवेदनशील विषय हो। यो विषय उठाइराखेर आमाको घाउ र उहाँहरूलाई पीडा दिने कि अनुसन्धान गरी न्याय दिने? घटना सम्झाइरहँदा उहाँहरूको मनमा शान्ति हुन्छ त? यो अनुसन्धानको विषय हो र सुक्ष्म अनुसन्धान भइरहेको छ,’ गृहमन्त्री गुरूङले भने, ‘अबदेखि यो प्रश्न प्रतिनिधि सभा र राष्ट्रिय सभामा नउठाउन म आग्रह गर्छु। बरू व्यक्तिगत रूपमा भेटेर मलाई यस विषयमा सोध्नुहोला, मसँग उत्तर छ। एउटी आमाको पीडामाथि मल्हम लगाउनुभन्दा घटना कोट्याइराख्ने? म यो विषयमा माफ माग्न चाहन्छु, राम्रो उत्तर दिन सक्दिनँ होला।’
यसपछि फेरि सांसद विश्वकर्माले पूरक प्रश्न सोधे।
आफूले प्रश्न सोध्ने र मन्त्रीले जबाफ दिने परम्परा रहे पनि आफ्नो विधायकी अधिकार हनन् भएको उनले बताए।
साथै उनले फेरि सोही प्रश्न दोहोर्याए, ‘सरकार गठन भएको सवा ४ महिना भइसक्यो। छानबिन समिति यतिका बेलासम्म निष्कर्षमा नपुग्नु दु:खद छ। अबको कति महिना, कति दिनमा निर्मलाले न्याय पाउँछिन्?’
गृहमन्त्रीले भने- म यसको उत्तर दिन चाहन्न।
